Read Rade Y-Yôp 8 Bible Online

Y-Yôp 8 - Rade bible

Y-Yôp 8

¹Y-Bildat, mnuih găp djuê Suah lŏ wĭt lač kơ Y-Yôp:

²“Dŭm boh sui ih srăng blŭ msĕ snăn? Boh blŭ mơ̆ng ƀăng êgei ih jing msĕ si angĭn êbŭ!

³Si ngă Aê Diê srăng bi msoh klei kpă ênô mơ̆? Amâodah Pô Mâo Jih Klei Myang bi msoh klei djŏ mơ̆?

⁴Tơdah phung anak ih ngă soh leh hŏng Aê Diê, Ñu brei digơ̆ tŭ klei bi kmhal kyua klei soh digơ̆ ngă leh.

⁵Tơdah ih srăng duah Aê Diê, leh anăn kwưh kơ Pô Mâo Jih Klei Myang,

⁶leh anăn tơdah ih jing êngeh leh anăn kpă ênô, snăn sĭt nik Ñu srăng kgŭ đru ih, leh anăn lŏ bi wĭt klei jăk kơ ih.

⁷Leh anăn wăt tơdah ară anei ih jing điêt, ƀiădah ti knhal tuč ih srăng jing prŏng snăk.

⁸Kâo kwưh kơ ih, êmuh bĕ kơ phung ênuk êlâo, leh anăn ksiêm bĕ ya klei phung aê aduôn tuôm ƀuh leh;

⁹kyuadah drei jing knŏng phung mrâo, ka thâo lu klei ôh leh anăn ênuk drei dôk hdĭp ti lăn ala jing msĕ si êyui.

¹⁰Amâo djŏ hĕ diñu srăng mtô kơ ih leh anăn hưn kơ ih, leh anăn blŭ klei diñu thâo săng leh mơ̆?

¹¹Dưi mơ̆ suah čăt hlăm anôk amâo mâo trăp? Dưi mơ̆ trang čăt jing ti anôk amâo mâo êa ôh?

¹²Êjai diñu ăt dôk bi mnga, ka arăng khăt ôh, diñu dliu krô êlâo kơ rơ̆k kyâo mkăn.

¹³Msĕ snăn klei truh kơ jih jang phung wơr bĭt Aê Diê; klei čang hmăng phung mnuih amâo đăo ôh srăng rai luč.

¹⁴Klei ñu knang luč hĕ, leh anăn anôk ñu knang djăl tloh msĕ si eh wăk wai.

¹⁵Ñu knang kơ sang ñu, ƀiădah gơ̆ amâo jing kjăp ôh; ñu djă krơ̆ng gơ̆, ƀiădah gơ̆ amâo lŏ dôk ôh.

¹⁶Pô wơr bĭt Aê Diê jing msĕ si rơ̆k kyâo čăt jing ti mđiă, kƀiêng ñu čăt tar ƀar hlăm war djam ñu.

¹⁷Agha ñu kčao ti kăm boh tâo; ñu čăt hlăm anôk boh tâo.

¹⁸Tơdah arăng buč ñu mơ̆ng anôk ñu, snăn anôk ñu dôk leh srăng hngah kơ ñu, lač, ‘Kâo amâo tuôm ƀuh ih ôh.’

¹⁹Msĕ snăn klei hdĭp ñu dliu krô, leh anăn rơ̆k kyâo mkăn srăng čăt ti anôk ñu.

²⁰Ƀiăđah Aê Diê amâo srăng hngah ôh kơ mnuih kpă ênô, kăn srăng krơ̆ng phung ƀai rei.

²¹Ñu ăt srăng bi bŏ ih hŏng klei tlao, leh anăn ih srăng ur hơ̆k.

²²Phung roh ih srăng bŏ hŏng klei hêñ, leh anăn sang čhiăm phung ƀai srăng rai luč jih.”