Read Rade Klei Mmuñ Hđăp 102 Bible Online

Klei Mmuñ Hđăp 102 - Rade bible

Klei Mmuñ Hđăp 102

¹Klei sa čô knap mñai wah lač êjai ñu êdu ai leh anăn ñu bi êdah klei ñu krao ênguôt ti anăp Yêhôwa. Ơ Yêhôwa, hmư̆ bĕ klei kâo wah lač; brei klei kâo ur kwưh truh kơ Ih.

²Đăm mdăp ƀô̆ mta Ih mơ̆ng kâo ôh êjai hruê kâo mâo klei knap mñai; mđing knga Ih kơ kâo. Ti hruê kâo iêô wah lač, brei Ih lŏ wĭt lač kơ kâo djăl!

³Kyuadah hruê kâo dôk hdĭp luč đuĕ msĕ si săp pui; leh anăn klang kâo hlơr msĕ si pui ƀơ̆ng.

⁴Ai tiê kâo êdu ai leh anăn krô msĕ si rơ̆k; kâo wơr bĭt ƀơ̆ng huă.

⁵Kyua asăp kâo krao, kâo êwang snăk tơl klang kâo êdah.

⁶Kâo jing msĕ si tlang grư̆ hlăm kdrăn tač, msĕ si mkao hlăm dliê êhŏng.

⁷Kâo krŏng, leh anăn kâo jing msĕ si sa drei čĭm dôk hjăn ti dlông čuôr găp.

⁸Phung roh kâo dlao wač kơ kâo jih hruê; leh anăn phung mưč kơ kâo yua anăn kâo tăm pah.

⁹Kyuadah kâo ƀơ̆ng hbâo hrô kơ kpŭng, leh anăn kâo bi lŭk êa kâo mnăm mbĭt hŏng êa ală,

¹⁰kyua klei Ih ngêñ ktang; kyuadah Ih duñ mă kâo leh anăn hwiê hĕ.

¹¹Hruê kâo dôk hdĭp jing msĕ si êyui ti mmăt wai băk; kâo dliu msĕ si rơ̆k.

¹²Ƀiădah Ih, Ơ Yêhôwa, jing mtao dôk hlŏng lar; anăn Ih dôk hlăm jih jang ênuk.

¹³Ih srăng kgŭ leh anăn pap kơ ƀuôn Siôn; kyuadah truh leh hruê pap kơ ñu, hruê bi kčah truh leh.

¹⁴Kyuadah phung dĭng buăl Ih khăp kơ boh tâo ñu; diñu pap kơ bruih lăn ñu.

¹⁵Phung găp djuê mnuih srăng huĭ mpŭ kơ anăn Yêhôwa, jih jang phung mtao ti lăn ala srăng huĭ mpŭ kơ klei guh kơang Ih.

¹⁶Kyuadah Yêhôwa srăng mdơ̆ng ƀuôn Siôn; Ñu srăng bi êdah hlăm klei guh kơang Ñu.

¹⁷Ñu srăng tŭ klei phung knap mñai wah lač, Ñu amâo bi êmut kơ klei digơ̆ wah lač ôh.

¹⁸Brei arăng čih pioh klei anei kơ ênuk êdei; čiăng kơ phung ƀuôn sang arăng ka kkiêng ôh srăng bi mni kơ Yêhôwa.

¹⁹Yêhôwa dlăng leh mơ̆ng anôk doh jăk Ñu ti dlông; mơ̆ng adiê Ñu dlăng kơ lăn ala,

²⁰čiăng hmư̆ klei phung mnă krao; čiăng bi mtlaih phung arăng pioh leh kơ klei djiê.

²¹Čiăng kơ phung mnuih dưi hưn anăn Yêhôwa hlăm ƀuôn Siôn, leh anăn bi mni kơ Ñu hlăm ƀuôn Yêrusalem

²²tơdah phung ƀuôn sang bi kƀĭn mbĭt hŏng lu ƀuôn ala mtao čiăng kkuh mpŭ kơ Yêhôwa.

²³Yêhôwa brei kâo jing awăt êjai kâo ăt hdĭp, Ñu bi hrŏ leh hruê kâo.

²⁴Kâo lač, Ơ Aê Diê kâo, đăm brei kâo djiê ôh êlâo kơ kâo mduôn; Ih dôk hdĭp hlăm jih jang ênuk.

²⁵Ênuk đưm Ih ngă atur kơ boh lăn; leh anăn jih adiê jing bruă kngan Ih ngă.

²⁶Diñu srăng rai tuč, ƀiădah Ih ăt dôk; jih jang diñu srăng tĭ sô msĕ si čhiăm ao. Ih bi mlih diñu msĕ si sa blah ao, leh anăn diñu srăng luč.

²⁷Ƀiădah Ih ăt dôk msĕ, leh anăn thŭn Ih dôk hdĭp amâo srăng jih ôh.

²⁸Phung anak phung dĭng buăl Ih srăng dôk hdĭp, leh anăn phung anak čô diñu srăng dôk kjăp ti anăp Ih.