Read Rade Klei Mmuñ Hđăp 104 Bible Online

Klei Mmuñ Hđăp 104 - Rade bible

Klei Mmuñ Hđăp 104

¹Ơ mngăt kâo, mpŭ mni bĕ kơ Yêhôwa. Ơ Yêhôwa, Aê Diê kâo, Ih jing prŏng êdi; Ih hơô leh klei guh kơang leh anăn klei kdrăm.

²Yêhôwa guôm Ñu pô hŏng klei mngač msĕ si sa blah ao jhung; Ñu lang leh jih adiê msĕ si sa blah sang čhiăm.

³Ñu ngă êda sang Ñu dôk ti dlông êa. Ñu brei knam jing êdeh Ñu đĭ; Ñu đĭ ti dlông siap angĭn.

⁴Ñu brei angĭn jing dĭng ktang Ñu; leh anăn êlah pui jing dĭng buăl Ñu.

⁵Ih dưm lăn ala ti dlông atur gơ̆, čiăng kơ gơ̆ amâo tuôm mgei ôh.

⁶Ih guôm gơ̆ leh hŏng anôk êlam msĕ si čhiăm ao; êa đĭ dlông hĭn kơ čư̆.

⁷Tơdah Ih ƀuah, phung êa đuĕ; hmư̆ ênai grăm Ih, diñu phiơr đuĕ.

⁸Diñu guôm jih jang čư̆, bi bŏ jih jang tlung, truh kơ anôk Ih bi kčah leh.

⁹Ih bi kčah leh kdriêl čiăng kơ êa amâo gao ôh; čiăng kơ diñu amâo lŏ guôm hĕ lăn ala ôh.

¹⁰Aê Diê brei akŏ êa đoh hlăm tlung; diñu đoh plah wah čư̆;

¹¹diñu bi mnăm jih jang hlô dliê; aseh dliê bi hlao mhao hŏng êa anăn.

¹²Čĭm hlăm adiê ngă hruh ktuê hang ñu, leh anăn dôk mñê hlăm adhan kyâo.

¹³Mơ̆ng anôk Ih dôk ti dlông, Ih krih čư̆; lăn ala bŏ hŏng klei jăk jĭn Ih brei.

¹⁴Ih brei rơ̆k čăt kơ hlô mnơ̆ng, leh anăn djam kơ mnuih yua, čiăng kơ ñu dưi mâo mnơ̆ng ƀơ̆ng huă mơ̆ng lăn,

¹⁵Kpiê čiăng bi mơak ai tiê mnuih, êa boh ôliwơ brei ƀô̆ mta ñu mngač, leh anăn kpŭng bi ktang ai tiê ñu.

¹⁶Kyâo Yêhôwa, ana kyâo sêdar čar Liƀan Ñu pla leh, arăng krih lu êa leh.

¹⁷Tinăn čĭm ngă hruh diñu; čĭm jhưng mâo anôk gơ̆ hlăm ana hngô.

¹⁸Čư̆ dlông kơ bê dliê; ƀăng boh tâo jing anôk kơ pai dôk.

¹⁹Ih brei leh mlan čiăng arăng thâo yan; yang hruê thâo mông ñu srăng lĕ.

²⁰Ih mjing klei mmăt, leh anăn mâo mlam, hlăk anăn jih jang hlô hlăm kmrơ̆ng kbiă hiu.

²¹Phung êđai êmông gu gruh kơ hlô diñu tiŏ mă, duah mnơ̆ng diñu ƀơ̆ng mơ̆ng Aê Diê.

²²Tơdah yang hruê ƀlĕ, diñu đuĕ wĭt, leh anăn đih hlăm ƀăng diñu dôk.

²³Bi mnuih kbiă nao kơ bruă ñu, leh anăn mă bruă tơl adiê tlam.

²⁴Ơ Yêhôwa, bruă Ih lu êdimima! Ih ngă diñu jih hŏng klei thâo mĭn; lăn ala bŏ leh hŏng mnơ̆ng Ih hrih.

²⁵Mâo êa ksĭ prŏng leh anăn ƀai, tinăn mâo mnơ̆ng hdĭp amâo dưi yap ôh, mnơ̆ng hdĭp điêt leh anăn prŏng.

²⁶Tinăn kŭmpăn êrô hiu; leh anăn lêwiathan dôk tinăn, mnơ̆ng prŏng Ih hrih leh brei hiu hlăp hlăm êa.

²⁷Jih jang mnơ̆ng anăn knang kơ Ih, čiăng kơ Ih brei mnơ̆ng diñu ƀơ̆ng ti djŏ mông.

²⁸Tơdah Ih brei mnơ̆ng ƀơ̆ng, diñu mă tŭ; tơdah Ih mđang kngan Ih, diñu bŏ dlai hŏng mnơ̆ng jăk Ih brei.

²⁹Tơdah Ih mdăp ƀô̆ Ih, diñu rŭng răng; tơdah Ih mă hĕ êwa mơ̆ng diñu, diñu djiê leh anăn lŏ wĭt kơ bruih lăn.

³⁰Tơdah Ih mơĭt Mngăt Myang Ih, diñu jing mtam; leh anăn Ih bi mrâo ƀô̆ mta lăn ala.

³¹Brei klei guh kơang Yêhôwa dôk hlŏng lar; brei Yêhôwa hơ̆k mơak kyua bruă Ñu.

³²Ñu dlăng kơ lăn ala, leh anăn gơ̆ ktư̆ yơ̆ng; Ñu ruêh phung čư̆, leh anăn diñu ƀlĕ săp pui.

³³Kâo srăng mmuñ kơ Yêhôwa jih jang hruê kâo dôk hdĭp; kâo srăng mmuñ bi mni kơ Aê Diê kâo êjai kâo dôk hdĭp.

³⁴Brei klei kâo mĭn dưi bi mơak kơ Ñu, êjai kâo hơ̆k mơak hlăm Yêhôwa.

³⁵Brei phung soh rai luč mơ̆ng lăn ala, leh anăn đăm lŏ mâo phung ƀai ôh. Ơ mngăt kâo, mpŭ mni bĕ kơ Yêhôwa. Bi mni kơ Yêhôwa.