Read Rade Klei Mmuñ Hđăp 105 Bible Online

Klei Mmuñ Hđăp 105 - Rade bible

Klei Mmuñ Hđăp 105

¹Bi mni bĕ kơ Yêhôwa, iêô wah lač kơ anăn Ñu; hưn bi thâo kơ phung ƀuôn sang bruă Ñu ngă leh.

²Mmuñ bĕ kơ Ñu, mmuñ bi mni bĕ kơ Ñu; yăl dliê bĕ jih bruă yuôm bhăn Ñu ngă.

³Bi mni bĕ kơ diih pô hlăm anăn doh jăk Ñu; brei ai tiê phung duah Yêhôwa hơ̆k mơak.

⁴Duah bĕ Yêhôwa leh anăn klei ktang Ñu; duah bĕ nanao ƀô̆ mta Ñu.

⁵Brei diih hdơr kơ bruă yuôm bhăn Ñu ngă leh, klei yuôm bhăn Ñu leh anăn klei phat kđi Ñu brei,

⁶Ơ phung anak čô Y-Abraham, dĭng buăl Ñu, Ơ phung anak êkei Y-Yakôp, phung Ñu ruah leh.

⁷Ñu yơh jing Yêhôwa, Aê Diê drei; klei Ñu phat kđi dôk tar ƀar lăn ala.

⁸Ñu hdơr nanao kơ klei Ñu bi mguôp, kơ klei Ñu ƀuăn pioh kơ êbâo ênuk,

⁹kơ klei bi mguôp Ñu ngă leh hŏng Y-Abraham, leh anăn kơ klei Ñu kat asei ƀuăn hŏng Y-Isăk.

¹⁰Ñu bi sĭt leh klei anăn hŏng Y-Yakôp jing sa klei bhiăn, hŏng phung Israel jing klei bi mguôp hlŏng lar,

¹¹Ñu lač, “Kâo brei kơ ih čar Kanaan, jing ngăn dưn djŏ kơ diih”.

¹²Êjai diñu jing knŏng phung ƀiă, phung ƀiă êdi, leh anăn jing tue hlăm čar anăn,

¹³hiu rưng mơ̆ng găp djuê anei kơ găp djuê anăn, mơ̆ng sa boh ƀuôn ala mtao kơ sa boh ƀuôn ala mtao mkăn.

¹⁴Yêhôwa amâo brei arăng ktư̆ juă diñu ôh; Ñu ƀuah phung mtao čiăng mgang diñu,

¹⁵lač, “Đăm ruêh ôh phung Kâo trôč êa ƀâo mngưi, đăm ngă jhat ôh kơ phung khua pô hưn êlâo Kâo.”

¹⁶Tơdah Ñu brei klei ư̆ êpa truh kơ čar, leh anăn mă hĕ jih mnơ̆ng ƀơ̆ng huă,

¹⁷Ñu tiŏ nao sa čô mnuih êlâo kơ diñu, Y-Yôsep, pô diñu čhĭ leh jing sa čô hlŭn.

¹⁸Arăng tling bi êka jơ̆ng gơ̆, arăng kă ti kkuê gơ̆ hŏng săng đai msei,

¹⁹tơl hruê klei gơ̆ hưn êlâo truh sĭt, klei Yêhôwa blŭ lông dlăng gơ̆ jing djŏ.

²⁰Mtao tiŏ nao arăng kleh gơ̆, pô kiă kriê lu phung ƀuôn sang phưi gơ̆.

²¹Ñu mjing gơ̆ khua kơ sang ñu, leh anăn khua kiă kriê jih jang ngăn ñu,

²²čiăng gơ̆ dưi mkra mjuăt phung khua ñu, leh anăn bi hriăm klei thâo mĭn kơ phung khua mduôn ñu.

²³Hlăk anăn Y-Israel nao kơ čar Êjip; Y-Yakôp dôk hlăm čar Čam msĕ si tue.

²⁴Yêhôwa brei phung ƀuôn sang Ñu jing lar êngŭm, leh anăn brei digơ̆ jing ktang hĭn kơ phung ktư̆ juă digơ̆.

²⁵Ñu bi mlih ai tiê phung Êjip brei bi êmut kơ phung ƀuôn sang Ñu, čiăng ngă mnêč kơ phung dĭng buăl Ñu.

²⁶Ñu tiŏ nao Y-Môis, dĭng buăl Ñu, leh anăn Y-Arôn, pô Ñu ruah leh.

²⁷Digơ̆ bi êdah klei bi knăl Yêhôwa ti krah phung anăn, leh anăn ngă klei yuôm bhăn hlăm čar Čam.

²⁸Ñu mơĭt klei mmăt, leh anăn jih čar jing mmăt, ƀiădah phung anăn amâo gưt asăp Ñu ôh.

²⁹Aê Diê bi mbliư̆ êa diñu jing êrah, leh anăn bi mdjiê kan diñu.

³⁰Čar diñu bŏ hŏng ajĭk tơl truh wăt hlăm adŭ phung khua diñu.

³¹Yêhôwa lač, leh anăn phung ruê jhat truh mtam, leh anăn mâo ktâo hlăm tar ƀar čar diñu.

³²Ñu brei pliêr lĕ hlăm čar diñu hrô kơ hjan, leh anăn mâo kmlă mtrang hlăm čar diñu.

³³Yêhôwa bi rai phŭn boh kriăk ƀâo leh anăn ana boh hra diñu, leh anăn bi joh ana kyâo hlăm čar diñu.

³⁴Yêhôwa blŭ, leh anăn ktuôp hriê, ktuôp lu tơl amâo dưi yap ôh.

³⁵Ktuôp anăn ƀơ̆ng jih rơ̆k hlăm čar leh anăn ƀơ̆ng boh hlăm hma diñu.

³⁶Yêhôwa bi mdjiê jih jang anak êkei kkiêng tal êlâo hlăm čar diñu, boh hlâo hlang jih klei ktang diñu.

³⁷Leh anăn Yêhôwa atăt bi kbiă phung Israel djă prăk leh anăn mah; leh anăn amâo mâo sa čô awăt ôh hlăm phung găp djuê ñu.

³⁸Phung Êjip mơak tơdah phung Israel đuĕ nao, kyuadah phung Êjip huĭ snăk kơ diñu.

³⁹Yêhôwa lang knam čiăng guôm diñu, leh anăn brei pui čiăng bi mngač diñu êjai mlam.

⁴⁰Diñu akâo, leh anăn Yêhôwa brei čĭm wăt truh, bi trei diñu hŏng kpŭng mơ̆ng adiê.

⁴¹Yêhôwa bi kđang boh tâo, leh anăn êa bluh ti tač; êa đoh găn kdrăn tač msĕ si êa krông.

⁴²Kyuadah Yêhôwa hdơr kơ klei Ñu ƀuăn doh jăk, brei leh kơ Y-Abraham, dĭng buăl Ñu.

⁴³Snăn Ñu atăt bi kbiă phung ƀuôn sang Ñu hŏng klei hơ̆k mơak, phung Ñu ruah leh hŏng klei mmuñ.

⁴⁴Yêhôwa brei kơ diñu lăn čar phung tue, leh anăn diñu plah mă boh mơ̆ng bruă phung ƀuôn sang mkăn,

⁴⁵čiăng kơ diñu djă pioh klei Yêhôwa mtă, leh anăn gưt klei bhiăn Ñu. Bi mni kơ Yêhôwa!