Read Rade Klei Mmuñ Hđăp 106 Bible Online

Klei Mmuñ Hđăp 106 - Rade bible

Klei Mmuñ Hđăp 106

¹Bi mni kơ Yêhôwa! Bi mni bĕ kơ Yêhôwa kyuadah Ñu jing jăk; kyuadah klei khăp Ñu dôk hlŏng lar.

²Hlei dưi yăl dliê bruă prŏng Yêhôwa ngă leh, hlei dưi hưn jih klei bi mni kơ Ñu?

³Jăk mơak yơh phung ngă klei djŏ, phung ngă klei kpă ênô nanao.

⁴Ơ Yêhôwa, brei Ih hdơr kơ kâo tơdah Ih brei klei jăk kơ phung ƀuôn sang Ih, đru kâo tơdah Ih bi mtlaih diñu,

⁵čiăng kơ kâo dưi ƀuh klei phung Ih ruah leh đĭ kyar, leh anăn dôk hơ̆k mơak kyua phung găp djuê Ih mơak, leh anăn mâo klei bi mni mbĭt hŏng phung ngăn dưn Ih.

⁶Hmei wăt phung aê hmei ngă soh leh; hmei ngă klei wê leh, hmei ngă klei ƀai leh.

⁷Phung aê hmei hlăm čar Êjip amâo mđing ôh kơ klei yuôm bhăn Ih ngă leh; diñu amâo lŏ hdơr ôh kơ klei jăk Ih êbeh dlai, ƀiădah diñu bi kdơ̆ng ti Êa Ksĭ Hrah.

⁸Ƀiădah Yêhôwa bi mtlaih diñu kyua anăn Gơ̆, čiăng bi êdah klei myang Gơ̆.

⁹Gơ̆ ƀuah Êa Ksĭ Hrah leh anăn ñu thu hĕ; Gơ̆ atăt phung ƀuôn sang găn anôk êlam msĕ si găn kdrăn tač.

¹⁰Gơ̆ bi mtlaih diñu mơ̆ng kngan phung roh, leh anăn bi êngiê diñu mơ̆ng klei myang phung roh.

¹¹Êa guôm phung roh diñu, amâo mâo sa čô adôk ôh.

¹²Hlăk anăn diñu đăo kơ klei Aê Diê ƀuăn; diñu mmuñ bi mni kơ Gơ̆.

¹³Ƀiădah diñu djăl wơr bĭt bruă Gơ̆; diñu amâo guôn ôh kơ klei Aê Diê kčĕ.

¹⁴Ƀiădah diñu tluh snăk hlăm kdrăn tač, leh anăn diñu lông dlăng Aê Diê hlăm anôk dliê êhŏng.

¹⁵Aê Diê brei kơ diñu ya klei diñu akâo, ƀiădah bi truh klei ruă bi rai diñu.

¹⁶Diñu nač kơ Y-Môis ti anôk diñu jưh, wăt kơ Y-Arôn, pô doh jăk Yêhôwa,

¹⁷lăn kđang leh anăn lun hĕ Y-Dathan, leh anăn lăn lŏ sir ti dlông phung Y-Abiram.

¹⁸Pui trŭn ngă kơ phung hlue diñu; êlah pui ƀơ̆ng hĕ phung ƀai.

¹⁹Diñu ngă rup êđai êmô hlăm čư̆ Hôrep, diñu buôn kkuh ti anăp rup diñu tuh.

²⁰Diñu bi mlih klei guh kơang Aê Diê diñu mjing hĕ rup êmô thâo ƀơ̆ng rơ̆k.

²¹Diñu wơr bĭt Aê Diê, Pô bi mtlaih diñu, Pô ngă bruă prŏng hlăm čar Êjip,

²²Pô ngă bruă yuôm bhăn hlăm čar Čam, Pô ngă klei bi huĭ ti Êa Ksĭ Hrah.

²³Snăn Aê Diê lač Gơ̆ srăng bi rai diñu. Ƀiădah Y-Môis, pô Gơ̆ ruah leh, dôk dơ̆ng plah wah diñu hŏng Aê Diê, čiăng bi weh klei Aê Diê ngêñ, amâo brei bi rai ôh.

²⁴Hlăk anăn diñu bi êmut kơ čar jăk siam; diñu amâo đăo ôh kơ klei Aê Diê ƀuăn.

²⁵Diñu blŭ dŭñ dŭñ hlăm sang čhiăm diñu, leh anăn amâo gưt asăp Yêhôwa ôh.

²⁶Kyuanăn Aê Diê kat asei kơ diñu, srăng bi rai diñu hlăm kdrăn tač,

²⁷Brei phung anak diñu lĕ ti krah phung găp djuê, leh anăn prah prŭng diñu hlăm lu boh čar.

²⁸Diñu bi mguôp hŏng yang Baal-Pêôr, leh anăn ƀơ̆ng mnơ̆ng ngă yang myơr leh kơ phung djiê.

²⁹Diñu bi riêl ai Yêhôwa kyua bruă jhat diñu ngă, leh anăn klei ruă tưp truh kơ diñu.

³⁰Hlăk anăn, Y-Phinêas kgŭ čiăng bi mghah brei klei soh, snăn klei ruă tưp anăn mdei.

³¹Aê Diê yap klei anei jing klei kpă kơ ñu hlăm jih jang ênuk hlŏng lar.

³²Diñu bi riêl ai Yêhôwa ti êa Mêriba, tơl Y-Môis mâo klei truh kyua diñu.

³³Kyuadah diñu bi rŭng klei mĭn gơ̆, tơl gơ̆ blŭ hŏng klei amâo răng ôh.

³⁴Diñu amâo bi rai ôh phung ƀuôn sang, tui si Yêhôwa mtă leh kơ diñu,

³⁵ƀiădah diñu bi dôk hŏng phung găp djuê mkăn, leh anăn ngă bruă phung anăn.

³⁶Diñu mă bruă kơ rup yang phung anăn, klei anăn jing kđông ƀêč kơ diñu.

³⁷Diñu ngă yang kơ phung yang jhat hŏng anak êkei, anak mniê diñu.

³⁸Diñu tuh êrah amâo mâo soh ôh, êrah anak êkei leh anăn anak mniê diñu, jing mnơ̆ng ngă yang kơ rup yang čar Kanaan; leh anăn čar jing čhŏ hŏng klei tuh êrah anăn.

³⁹Snăn diñu jing čhŏ leh hŏng bruă diñu ngă; leh anăn ngă klei knhông.

⁴⁰Kyuanăn Yêhôwa čuh ai ngêñ kơ phung ƀuôn sang Gơ̆, leh anăn Gơ̆ bi êmut snăk kơ ngăn dưn Gơ̆.

⁴¹Gơ̆ jao phung Israel hlăm kngan phung găp djuê mkăn; snăn phung bi êmut kơ diñu kiă kriê diñu.

⁴²Phung roh diñu ktư̆ juă diñu, leh anăn bi mŭt diñu ti gŭ kngan phung roh.

⁴³Lu blư̆ Aê Diê bi mtlaih diñu, ƀiădah diñu bi kdơ̆ng leh anăn lĕ kram hlăm klei wê diñu.

⁴⁴Ƀiădah Aê Diê ƀuh klei knap mñai diñu, tơdah hmư̆ klei diñu krao.

⁴⁵Ñu pap kơ phung anăn kyua Ñu hdơr klei Ñu bi mguôp leh, leh anăn Ñu pap brei kơ digơ̆ kyua klei khăp Ñu.

⁴⁶Yêhôwa brei jih jang phung mjing digơ̆ mnă mâo klei pap kơ digơ̆.

⁴⁷Bi mtlaih hmei bĕ, Ơ Yêhôwa, Aê Diê hmei, leh anăn bi kƀĭn hmei mơ̆ng phung găp djuê mnuih, čiăng kơ hmei dưi bi mni kơ anăn doh jăk Ih, leh anăn hơ̆k mơak bi mni kơ Ih.

⁴⁸Mpŭ mni kơ Yêhôwa, Aê Diê phung Israel, mơ̆ng ênuk hlŏng lar truh kơ ênuk hlŏng lar. Leh anăn brei jih jang phung ƀuôn sang lač, Amen. Bi mni kơ Yêhôwa!