Read Rade Klei Mmuñ Hđăp 109 Bible Online

Klei Mmuñ Hđăp 109 - Rade bible

Klei Mmuñ Hđăp 109

¹Kơ khua phung mmuñ. Klei mmuñ hđăp Y-Đawit. Ơ Aê Diê, Pô kâo bi mni, đăm dôk ñăt ôh;

²kyuadah ƀăng êgei phung ƀai leh anăn phung mplư ha leh čiăng ngă kơ kâo; diñu blŭ klei luar kơ kâo.

³Diñu wang kâo hŏng klei blŭ bi êmut, leh anăn bi blah hŏng kâo amâo mâo klei ôh.

⁴Wăt tơdah kâo khăp kơ diñu, wăt êjai kâo wah lač kơ diñu, diñu kčŭt kơ kâo.

⁵Diñu bi wĭt klei jhat kơ kâo kơ klei jăk kâo ngă leh kơ diñu, leh anăn bi wĭt klei bi êmut kơ klei kâo khăp kơ diñu.

⁶Brei sa čô mnuih ƀai ngă kơ ñu; brei sa čô kčŭt dôk tĭng hnuă ñu.

⁷Tơdah arăng phat kđi ñu, brei arăng yap ñu soh; leh anăn yap klei ñu wah lač jing klei soh.

⁸Brei hruê ñu dôk hdĭp jing ƀiă; brei sa čô mkăn hrô bruă ñu.

⁹Brei phung anak ñu jing phung anak êrĭt, leh anăn mô̆ ñu jing mniê djiê ung.

¹⁰Brei phung anak ñu hiu rưng leh anăn hiu dan; brei arăng suôt diñu mơ̆ng anôk diñu dôk rai leh.

¹¹Brei pô ñu đuôm nư mă jih jang mnơ̆ng ñu mâo; leh anăn brei phung tue plah mă boh mơ̆ng bruă ñu.

¹²Đăm brei mâo sa čô ngă jăk kơ ñu ôh, kăn brei mâo rei sa čô pap kơ phung anak ñu êrĭt.

¹³Brei phung anak čô ñu djiê; lăm hĕ anăn găp djuê ñu mơ̆ng lăn ala hlăm ênuk tal dua.

¹⁴Brei Yêhôwa hdơr kơ klei wê phung aê Ñu, leh anăn đăm lăm hĕ ôh klei soh amĭ Ñu.

¹⁵Brei Yêhôwa hdơr nanao klei soh diñu, čiăng kơ arăng amâo lŏ hdơr kơ diñu ti lăn ala ôh.

¹⁶Kyuadah ñu amâo hdơr ngă klei pap ôh, ƀiădah ñu tiŏ phung knap mñai, ƀun ƀin, wăt phung mâo ai tiê ênguôt čiăng bi mdjiê digơ̆.

¹⁷Ñu khăp tăm pah, snăn brei klei tăm pah lĕ kơ ñu; ñu amâo khăp hơêč hmưi klei jăk jĭn ôh, snăn brei klei jăk jĭn đuĕ kbưi mơ̆ng ñu.

¹⁸Ñu bi hơô ñu pô hŏng klei tăm pah msĕ si čhiăm ao ñu; klei tăm pah mŭt asei mlei ñu msĕ si êa, msĕ si êa prăi hlăm klang ñu.

¹⁹Brei klei anăn jing msĕ si čhiăm ao ñu hơô, msĕ si hdrăng kơiêng ñu hyuă grăp hruê.

²⁰Brei Yêhôwa mưn msĕ snăn kơ phung roh kâo, kơ phung blŭ klei ƀai kơ mngăt kâo.

²¹Ƀiădah, Ơ Yêhôwa Khua Yang, brei Ih ngă hŏng klei jăk kơ kâo kyua anăn Ih; kyua klei khăp Ih jing prŏng, bi mtlaih kâo bĕ.

²²Kyuadah kâo knap mñai leh anăn ƀun ƀin, ai tiê kâo êka leh hlăm lam.

²³Kâo dơ̆ng đuĕ nao msĕ si êyui ti adiê tlam; arăng tăm kâo msĕ si ktuôp.

²⁴Kơŭt kâo awăt hŏng klei kăm ƀơ̆ng huă; asei mlei kâo êwang.

²⁵Phung kčŭt kơ kâo tlao mưč kơ kâo; tơdah diñu ƀuh kâo diñu kteh kŏ.

²⁶Đru kâo, Ơ Yêhôwa Aê Diê kâo; bi mtlaih kâo bĕ kyua klei khăp Ih.

²⁷Brei diñu thâo kngan Ih yơh bi mtlaih kâo; Ih yơh, Ơ Yêhôwa, ngă leh klei anăn.

²⁸Lui diñu tăm pah, ƀiădah brei Ih brei klei jăk jĭn; tơdah diñu bi kdơ̆ng arăng srăng bi hêñ diñu, ƀiădah dĭng buăl Ih srăng hơ̆k mơak.

²⁹Brei phung kčŭt kơ kâo tŭ klei hêñ, brei diñu hơô klei hêñ msĕ si sa blah ao jhung!

³⁰Ƀăng kƀông kâo srăng bi mni lu kơ Yêhôwa; kâo srăng bi mni kơ Ñu ti krah phung lu.

³¹Kyuadah Ñu dôk dơ̆ng tĭng hnuă pô kƀah, čiăng bi mtlaih gơ̆ mơ̆ng phung phat kđi gơ̆.