Read Rade Klei Mmuñ Hđăp 11 Bible Online

Klei Mmuñ Hđăp 11 - Rade bible

Klei Mmuñ Hđăp 11

¹Kơ khua phung mmuñ. Klei mmuñ hđăp Y-Đawit. Kâo kđap hlăm Yêhôwa; si ngă ih lač kơ kâo, “Đuĕ bĕ kơ čư̆ ih msĕ si sa drei čĭm;

²kyuadah nĕ anei, phung ƀai ƀêč hna, diñu tam ƀrăm, čiăng mnah êjai mmăt kơ phung mâo ai tiê kpă.

³Tơdah atur sang klưh leh, ya pô kpă dưi ngă?”

⁴Yêhôwa dôk hlăm sang yang doh jăk Ñu, jhưng mtao Yêhôwa dôk hlăm adiê; ală Ñu dlăng, pŭk ală Ñu ksiêm phung anak mnuih.

⁵Yêhôwa lông dlăng pô kpă; ƀiădah Ñu bi êmut kơ pô ƀai, leh anăn kơ pô khăp ngă klei jhŏng ƀai.

⁶Ñu srăng tuh hdăng ngur leh anăn boh tâo pui kơ phung ƀai; leh anăn angĭn hlơr jing atŏ arăng bi mbha brei kơ diñu.

⁷Kyuadah Yêhôwa jing kpă, Ñu khăp kơ bruă kpă; phung mnuih kpă srăng dlăng ƀô̆ mta Ñu.