Read Rade Klei Mmuñ Hđăp 111 Bible Online

Klei Mmuñ Hđăp 111 - Rade bible

Klei Mmuñ Hđăp 111

¹Bi mni kơ Yêhôwa. Kâo srăng bi mni kơ Yêhôwa hŏng jih ai tiê kâo hlăm klei bi kƀĭn phung kpă.

²Jih bruă Yêhôwa jing prŏng êdi! jih jang phung mơak hŏng bruă anăn duah čiăng thâo săng digơ̆.

³Bruă Ñu bŏ hŏng klei mpŭ leh anăn klei kdrăm; leh anăn klei kpă ênô Ñu dôk hlŏng lar.

⁴Ñu brei arăng hdơr kơ bruă yuôm bhăn Ñu ngă leh; Yêhôwa jing jăk leh anăn thâo pap.

⁵Ñu brei mnơ̆ng ƀơ̆ng huă kơ phung huĭ mpŭ kơ Ñu; Ñu hdơr nanao kơ klei Ñu bi mguôp.

⁶Ñu bi êdah leh kơ phung ƀuôn sang Ñu klei myang bruă Ñu, êjai jao kơ digơ̆ ngăn dưn phung găp djuê mnuih.

⁷Bruă kngan Ñu jing sĭt suôr leh anăn kpă; arăng dưi knang kơ jih klei Ñu čih leh.

⁸Klei Ñu čih dôk kjăp hlŏng lar, brei leh hŏng klei sĭt nik leh anăn klei kpă.

⁹Ñu brei leh klei bi tui kơ phung ƀuôn sang Ñu; Ñu ngă klei bi mguôp hlŏng lar, Anăn Ñu doh jăk leh anăn năng huĭ.

¹⁰Klei huĭ mpŭ kơ Yêhôwa jing Klei mphŭn dơ̆ng kơ klei thâo mĭn; hlei pô tui ngă klei Ñu mtă mâo klei thâo săng jăk. Klei bi mni kơ Ñu dôk hlŏng lar.