Read Rade Klei Mmuñ Hđăp 115 Bible Online

Klei Mmuñ Hđăp 115 - Rade bible

Klei Mmuñ Hđăp 115

¹Amâo djŏ kơ hmei, Ơ Yêhôwa, amâo djŏ kơ hmei ôh, ƀiădah kơ anăn Ih yơh brei klei guh kơang, kyua klei khăp Ih leh anăn klei sĭt suôr Ih.

²Si ngă phung găp djuê mnuih lač, “Ti Aê Diê diñu lĕ?”

³Aê Diê drei dôk hlăm adiê; Ñu ngă tui si klei Ñu čiăng.

⁴Rup yang diñu ngă hŏng prăk leh anăn mah, jing bruă kngan mnuih ngă.

⁵Digơ̆ mâo ƀăng êgei, ƀiădah amâo thâo blŭ ôh; digơ̆ mâo ală, ƀiădah amâo thâo ƀuh ôh;

⁶digơ̆ mâo knga, ƀiădah amâo thâo hmư̆ ôh; digơ̆ mâo adŭng, ƀiădah amâo thâo ƀâo ôh;

⁷digơ̆ mâo kngan, ƀiădah amâo thâo ruêh ôh; digơ̆ mâo jơ̆ng, ƀiădah amâo thâo êbat ôh; kăn đŏk digơ̆ thâo bi ênai rei.

⁸Phung ngă digơ̆ jing msĕ si digơ̆, wăt jih jang phung knang kơ digơ̆ msĕ mơh.

⁹Ơ phung Israel, knang bĕ kơ Yêhôwa; Ñu jing Pô đru leh anăn khil diih.

¹⁰Ơ sang Y-Arôn, knang bĕ kơ Yêhôwa; Ñu jing Pô đru leh anăn khil diih.

¹¹Ơ diih phung huĭ mpŭ kơ Yêhôwa, knang bĕ kơ Yêhôwa; Ñu jing Pô đru leh anăn khil diih.

¹²Yêhôwa hdơr mĭn leh kơ drei, Ñu srăng brei klei jăk jĭn kơ drei: Ñu srăng brei klei jăk jĭn kơ sang Israel, Ñu srăng brei klei jăk jĭn kơ sang Y-Arôn,

¹³Ñu srăng brei klei jăk jĭn kơ phung huĭ mpŭ kơ Yêhôwa, wăt phung điêt leh anăn phung prŏng.

¹⁴Akâo kơ Yêhôwa brei anak lu kơ diih, wăt čô čĕ lu msĕ mơh.

¹⁵Akâo bĕ kơ Yêhôwa Pô hrih leh adiê leh anăn lăn ala brei klei jăk jĭn kơ diih.

¹⁶Adiê jing dŏ Yêhôwa; ƀiădah Ñu brei lăn ala kơ phung anak mnuih.

¹⁷Phung djiê amâo bi mni kơ Yêhôwa ôh, pô trŭn hlăm anôk ñăt kriêp kăn rei.

¹⁸Ƀiădah drei srăng mpŭ mni kơ Yêhôwa, mơ̆ng ară anei hlŏng lar. Bi mni kơ Yêhôwa.