Read Rade Klei Mmuñ Hđăp 116 Bible Online

Klei Mmuñ Hđăp 116 - Rade bible

Klei Mmuñ Hđăp 116

¹Kâo khăp kơ Yêhôwa kyuadah Ñu hmư̆ leh asăp kâo leh anăn klei kâo kwưh.

²Kyuadah Ñu mđing leh knga Ñu kơ kâo, kâo srăng iêô wah lač kơ Ñu jih hruê kâo dôk hdĭp.

³Bră klei djiê hyuă jŭm kâo leh, leh anăn klei hyưt Ƀuôn Phung Djiê djă kâo leh; kâo rŭng răng leh anăn ênguôt hnĭng.

⁴Hlăk anăn, kâo iêô wah lač kơ anăn Yêhôwa: “Ơ Yêhôwa, kâo kwưh kơ Ih, bi mtlaih kâo bĕ”.

⁵Yêhôwa jing jăk leh anăn kpă ênô; Aê Diê drei thâo pap.

⁶Yêhôwa kiă kriê phung awăt êdu; tơdah kâo knap mñai Ñu bi mtlaih kâo.

⁷Ơ mngăt kâo, lŏ dôk êđăp ênang bĕ, kyuadah Yêhôwa ngă jăk êbeh dlai kơ ih.

⁸Kyuadah Ih bi mtlaih leh mngăt kâo mơ̆ng klei djiê, ală kâo mơ̆ng klei hia, jơ̆ng kâo mơ̆ng klei lĕ buh.

⁹Kâo srăng êbat ti anăp Yêhôwa ti lăn ala phung hdĭp.

¹⁰Wăt tơdah kâo lač, kâo knap mñai snăk, Kâo djă pioh klei đăo.

¹¹Kâo lač hlăm klei kâo rŭng răng, “Jih jang mnuih jing phung luar.”

¹²Ya dŏ kâo srăng bi wĭt kơ Yêhôwa, kyua jih klei jăk Ñu ngă leh kơ kâo?

¹³Kâo srăng mă atŏ klei bi mtlaih, leh anăn iêô wah lač kơ anăn Yêhôwa.

¹⁴Kâo srăng bi sĭt klei kâo ƀuăn kơ Yêhôwa, ti anăp jih jang phung ƀuôn sang Ñu.

¹⁵Klei phung doh jăk Ñu djiê jing yuôm snăk ti anăp ală Yêhôwa.

¹⁶Ơ Yêhôwa, sĭt nik kâo jing dĭng buăl Ih, kâo jing dĭng buăl Ih, anak êkei dĭng buăl mniê Ih; Ih kleh leh bră kă kâo.

¹⁷Kâo srăng myơr kơ Ih mnơ̆ng myơr bi mni kơ Ih, leh anăn iêô wah lač kơ anăn Yêhôwa.

¹⁸Kâo srăng bi sĭt klei kâo ƀuăn kơ Yêhôwa, ti anăp jih jang phung ƀuôn sang Ñu,

¹⁹hlăm wăl sang Yêhôwa, ti krah Ih, Ơ ƀuôn Yêrusalem. Bi mni kơ Yêhôwa.