Read Rade Klei Mmuñ Hđăp 119 Bible Online

Klei Mmuñ Hđăp 119 - Rade bible

Klei Mmuñ Hđăp 119

¹Jăk mơak yơh phung amâo mâo klei arăng dưi ƀuah ôh, phung êbat tui hlue klei bhiăn Yêhôwa.

²Jăk mơak yơh phung djă pioh klei Ñu hưn, phung tui duah Ñu hŏng jih ai tiê.

³Phung anăn amâo ngă klei wê ôh, ƀiădah diñu êbat hlăm êlan Yêhôwa.

⁴Ih brei leh klei Ih čih kơ hmei, čiăng kơ hmei hur har tui hlue.

⁵Kâo čiăng kơ êlan kâo jing kjăp, êjai gưt klei bhiăn Ih!

⁶Snăn kâo amâo srăng hêñ ôh, êjai kâo dlăng kơ jih klei Ih mtă.

⁷Kâo srăng bi mni kơ Ih hŏng ai tiê kpă, êjai hriăm klei Ih phat kđi djŏ.

⁸Kâo srăng gưt klei bhiăn Ih; đăm lui hĕ kâo ôh.

⁹Si êkei hlăk ai srăng bi doh êlan ñu? Hŏng klei ñu gưt kơ klei Ih blŭ yơh.

¹⁰Kâo duah Ih hŏng jih ai tiê; đăm brei kâo weh đuĕ mơ̆ng klei Ih mtă ôh.

¹¹Kâo djă pioh leh klei Ih blŭ hlăm ai tiê kâo, čiăng kơ kâo amâo ngă soh hŏng Ih ôh.

¹²Mpŭ mni kơ Ih, Ơ Yêhôwa, bi hriăm kâo klei bhiăn Ih.

¹³Hŏng ƀăng kƀông kâo dôk hưn jih klei ƀăng êgei Ih mtă.

¹⁴Kâo mâo klei mơak tui êlan klei Ih hưn, msĕ si tơdah kâo mâo jih klei mdrŏng.

¹⁵Kâo srăng ksiêm mĭn kơ klei Ih čih, leh anăn dlăng kơ êlan Ih.

¹⁶Kâo srăng mơak hlăm klei bhiăn Ih; kâo amâo srăng wơr bĭt ôh klei Ih blŭ.

¹⁷Ngă klei jăk kơ dĭng buăl Ih čiăng kơ kâo dưi dôk hdĭp, leh anăn tui gưt klei Ih blŭ.

¹⁸Mblang ală kâo čiăng kơ kâo dưi ƀuh klei yuôm bhăn hlăm klei bhiăn Ih.

¹⁹Kâo jing sa čô tue ti lăn ala; đăm mdăp klei Ih mtă kơ kâo ôh.

²⁰Mngăt kâo mčah leh kyua čiăng thâo nanao klei Ih mtă.

²¹Ih ƀuah kơ phung mgao, phung arăng tăm pah leh, phung weh mơ̆ng klei Ih mtă.

²²Mă hĕ mơ̆ng kâo klei diñu bi hêñ leh anăn bi êmut, kyuadah kâo djă pioh klei Ih hưn.

²³Wăt tơdah phung khua dôk gŭ trông čhai ngă kơ kâo, dĭng buăl Ih srăng ksiêm mĭn kơ klei bhiăn Ih.

²⁴Klei Ih hưn jing klei hơ̆k mơak kơ kâo, jing phung kčĕ kơ kâo.

²⁵Mngăt kâo đuôm hŏng ƀruih lăn; lŏ bi hdĭp kâo tui si klei Ih blŭ.

²⁶Tơdah kâo hưn jih êlan kâo, Ih lŏ wĭt lač leh kơ kâo; bi hriăm kâo klei bhiăn Ih.

²⁷Brei kâo thâo săng êlan klei Ih čih; leh anăn kâo srăng dôk mĭn kơ bruă yuôm bhăn Ih.

²⁸Mngăt kâo bŏ hŏng klei ênguôt ktrŏ; bi ktang kâo tui si klei Ih blŭ.

²⁹Mgang kâo kơ êlan soh; leh anăn hŏng klei pap bi hriăm kâo klei bhiăn Ih.

³⁰Kâo ruah leh êlan klei sĭt suôr; kâo răng kơ klei Ih mtă.

³¹Ơ Yêhôwa, kâo djă pioh klei Ih hưn; đăm brei arăng bi hêñ kâo ôh.

³²Kâo srăng êran tui hlue êlan klei Ih mtă, kyuadah Ih bi êngiê ai tiê kâo leh.

³³Bi hriăm kâo, Ơ Yêhôwa, êlan klei bhiăn Ih, leh anăn kâo srăng djă pioh ñu tơl knhal tuč.

³⁴Brei kơ kâo klei thâo săng, čiăng kơ kâo dưi djă pioh klei bhiăn Ih, leh anăn gưt ñu hŏng jih ai tiê.

³⁵Atăt ba kâo ti êlan klei Ih mtă, kyuadah kâo mơak hlăm klei anăn.

³⁶Brei ai tiê kâo khăp kơ klei Ih hưn, leh anăn amâo djŏ khăp kơ mdrŏng sah ôh.

³⁷Bi weh ală kâo mơ̆ng klei dlăng mnơ̆ng hơăi mang; brei kâo dôk hdĭp tui hlue êlan Ih.

³⁸Brei Ih bi sĭt klei Ih blŭ kơ dĭng buăl Ih, pioh kơ klei huĭ mpŭ kơ Ih.

³⁹Kâo huĭ arăng srăng bi hêñ kâo, đăm brei klei anăn truh ôh, kyuadah klei Ih mtă jing jăk.

⁴⁰Nĕ anei, kâo hnĭng kơ klei Ih čih! Kyua klei kpă ênô Ih brei kâo dôk hdĭp.

⁴¹Ơ Yêhôwa, brei klei khăp Ih truh kơ kâo, bi mtlaih kâo tui si klei Ih blŭ.

⁴²Snăn kơh kâo dưi lŏ wĭt lač kơ pô dlao wač kơ kâo, kyuadah kâo knang kơ klei Ih blŭ.

⁴³Đăm mă hĕ klei blŭ sĭt nik mơ̆ng ƀăng êgei kâo ôh, kyuadah kâo čang hmăng leh kơ klei Ih mtă.

⁴⁴Kâo srăng gưt klei bhiăn Ih nanao, nanao hlŏng lar.

⁴⁵Kâo srăng êbat hŏng klei êngiê, kyuadah kâo tui duah leh klei Ih čih.

⁴⁶Msĕ mơh kâo srăng blŭ klei Ih hưn ti anăp phung mtao, leh anăn arăng amâo srăng bi hêñ kâo ôh,

⁴⁷kyuadah kâo mơak hlăm klei Ih mtă, jing klei kâo khăp leh.

⁴⁸Kâo mpŭ kơ klei Ih mtă jing klei kâo khăp, leh anăn kâo srăng ksiêm mĭn kơ klei bhiăn Ih.

⁴⁹Hdơr bĕ klei Ih blŭ kơ dĭng buăl Ih, hŏng klei anei Ih brei kâo mâo klei čang hmăng.

⁵⁰Klei anei jing klei bi juh kâo hlăm klei knap mñai: klei Ih ƀuăn brei klei hdĭp kâo.

⁵¹Phung mgao mưč snăk kơ kâo, ƀiădah kâo amâo weh ôh mơ̆ng klei bhiăn Ih.

⁵²Kâo hdơr kơ klei Ih mtă mơ̆ng ênuk đưm, klei anăn bi juh kâo, Ơ Yêhôwa.

⁵³Kâo čuh ai ngêñ kyua ƀuh phung ƀai, phung lui hĕ leh klei bhiăn Ih.

⁵⁴Klei bhiăn Ih jing klei kâo mmuñ, măng ai ti anôk kâo dôk.

⁵⁵Êjai mlam kâo hdơr kơ anăn Ih, Ơ Yêhôwa, leh anăn kâo djă pioh klei bhiăn Ih.

⁵⁶Kâo mâo klei jăk jĭn anei, jing klei kâo djă pioh klei Ih čih.

⁵⁷Yêhôwa jing kdrêč pioh kơ kâo; kâo ƀuăn kâo srăng gưt klei Ih blŭ.

⁵⁸Kâo kwưh klei pap Ih hŏng jih ai tiê: pap mñai kơ kâo tui si klei Ih ƀuăn.

⁵⁹Kâo ksiêm leh êlan kâo; kâo bi wir jơ̆ng kâo phă klei Ih hưn.

⁶⁰Kâo ruăt, amâo lŏ krư̆i ôh, čiăng tui hlue klei Ih mtă.

⁶¹Wăt tơdah phung ƀai kă kâo hŏng klei bră, kâo amâo wơr bĭt klei bhiăn Ih ôh.

⁶²Ti krah mlam kâo kgŭ čiăng bi mni kơ Ih kyua klei Ih phat kđi jing kpă.

⁶³Kâo jing mah jiăng kơ jih jang phung huĭ mpŭ kơ Ih, kơ phung tui hlue klei Ih čih.

⁶⁴Ơ Yêhôwa, lăn ala bŏ hŏng klei khăp Ih; bi hriăm kâo klei bhiăn Ih.

⁶⁵Ơ Yêhôwa, Ih ngă leh klei jăk kơ dĭng buăl Ih, tui si klei Ih blŭ.

⁶⁶Bi hriăm kâo klei djŏ leh anăn klei thâo săng; kyuadah kâo đăo kơ klei Ih mtă.

⁶⁷Êlâo kơ kâo mâo klei knap kâo wơr êlan leh, ƀiădah ară anei kâo tui hlue klei Ih blŭ.

⁶⁸Ih jing jăk, leh anăn Ih ngă klei jăk; bi hriăm kâo klei bhiăn Ih.

⁶⁹Phung mgao blŭ luar djŏ kơ kâo, ƀiădah hŏng jih ai tiê kâo gưt klei Ih čih.

⁷⁰Ai tiê diñu kpal msĕ si prăi, ƀiădah kâo mơak hlăm klei bhiăn Ih.

⁷¹Klei kâo tŭ leh klei knap mñai jing klei jăk kơ kâo, čiăng kơ kâo dưi hriăm klei bhiăn Ih.

⁷²Klei bhiăn mơ̆ng ƀăng êgei Ih jing yuôm hĭn kơ kâo hŏng lu êbâo klŏ mah leh anăn prăk.

⁷³Kngan Ih hrih leh anăn mmuôn kâo leh; brei kơ kâo klei thâo săng, čiăng kơ kâo dưi hriăm klei Ih mtă.

⁷⁴Phung huĭ mpŭ kơ Ih srăng ƀuh kâo leh anăn hơ̆k kdơ̆k, kyuadah kâo čang hmăng leh hlăm klei Ih blŭ.

⁷⁵Ơ Yêhôwa, kâo thâo klei Ih phat kđi jing kpă, leh anăn hŏng klei sĭt suôr Ih bi knap kâo leh.

⁷⁶Brei klei khăp Ih bi juh kâo, tui si Ih ƀuăn leh kơ dĭng buăl Ih.

⁷⁷Brei Ih pap kơ kâo čiăng kơ kâo dưi dôk hdĭp, kyuadah kâo khăp čiăng kơ klei bhiăn Ih.

⁷⁸Brei phung mgao, mâo klei hêñ kyuadah diñu duah mplư kâo hŏng klei luar, ƀiădah kâo srăng dôk ksiêm mĭn kơ klei Ih čih.

⁷⁹Brei phung huĭ mpŭ kơ Ih hriê kơ kâo, čiăng kơ diñu dưi thâo klei Ih hưn.

⁸⁰Brei ai tiê kâo gưt jih klei bhiăn Ih, čiăng kơ kâo amâo srăng hêñ ôh.

⁸¹Mngăt kâo êmăn dôk guôn klei Ih bi mtlaih; kâo čang hmăng hlăm klei Ih blŭ.

⁸²Ală kâo dliu dôk guôn klei Ih ƀuăn, êjai kâo êmuh, Hbĭl Ih srăng bi juh kâo?

⁸³Kyuadah kâo jing msĕ si kdô klĭt ti săp pui, kâo amâo wơr bĭt ôh klei bhiăn Ih.

⁸⁴Dŭm boh sui dĭng buăl Ih srăng dôk guôn? Hbĭl Ih srăng phat kđi phung ngă jhat kơ kâo?

⁸⁵Phung mgao klei ƀăng bi lĕ kâo; diñu amâo ngă tui si klei bhiăn Ih ôh.

⁸⁶Jih jang klei Ih mtă jing năng knang; đru kâo bĕ kyua arăng ngă jhat kơ kâo hŏng klei blŭ luar.

⁸⁷Diñu păt čiăng bi mdjiê kâo, ƀiădah kâo amâo lui ôh klei Ih čih.

⁸⁸Brei ih mgang klei hdĭp kâo tui si klei khăp Ih; čiăng kơ kâo dưi djă pioh klei ƀăng êgei Ih hưn.

⁸⁹Ơ Yêhôwa, Ih dôk hlŏng lar klei Ih blŭ dôk kjăp nanao hlăm adiê.

⁹⁰Klei sĭt suôr Ih dôk hlăm jih jang ênuk; Ih mjing leh lăn ala, leh anăn ñu dôk kjăp.

⁹¹Tui si klei Ih čuăn diñu ăt dôk truh ti hruê anei, kyuadah jih jang mnơ̆ng jing dĭng buăl Ih sơăi.

⁹²Tơdah klei bhiăn Ih amâo jing klei mơak kơ kâo, kâo rai tuč leh hlăm klei knap mñai kâo.

⁹³Kâo amâo srăng wơr bĭt ôh klei Ih mtă, kyuadah hŏng klei mtă anăn yơh Ih bi hdĭp kâo.

⁹⁴Kâo jing dŏ Ih, bi mtlaih kâo bĕ, kyuadah kâo tui duah leh klei Ih mtă.

⁹⁵Phung ƀai kăp guôn čiăng bi rai kâo, ƀiădah kâo dôk ksiêm mĭn kơ klei Ih hưn.

⁹⁶Kâo ƀuh leh mâo klei knhal tuč kơ jih jang mnơ̆ng; ƀiădah klei bhiăn Ih amâo mâo knhal ôh.

⁹⁷Kâo khăp êdimi kơ klei bhiăn Ih! Jih hruê kâo dôk ksiêm mĭn kơ klei anăn.

⁹⁸Klei Ih mtă brei kâo thâo mĭn hĭn kơ phung roh kâo, kyuadah klei Ih mtă dôk nanao mbĭt hŏng kâo.

⁹⁹Kâo mâo klei thâo săng hĭn kơ jih jang phung mtô kâo, kyuadah klei Ih hưn jing mnơ̆ng kâo dôk ksiêm mĭn.

¹⁰⁰Kâo thâo săng lu hĭn kơ phung mduôn, kyuadah kâo djă pioh klei Ih mtă.

¹⁰¹Kâo kơ̆ng jơ̆ng kâo amâo brei êbat ti êlan jhat ôh, čiăng kơ kâo dưi djă pioh klei Ih blŭ.

¹⁰²Kâo amâo weh mơ̆ng klei Ih mtô ôh; kyuadah Ih pô bi hriăm kâo leh.

¹⁰³Klei Ih blŭ jing mmih kơ êlah kâo, mmih hĭn kơ êa hnuê!

¹⁰⁴Hŏng klei Ih mtă kâo mâo klei thâo săng; kyuanăn kâo bi êmut jih êlan soh.

¹⁰⁵Klei Ih blŭ jing pui kđen kơ jơ̆ng kâo, leh anăn klei mngač kơ êlan kâo.

¹⁰⁶Kâo kat asei leh anăn kâo bi sĭt klei anăn čiăng tui hlue klei mtă Ih kpă ênô.

¹⁰⁷Kâo mâo klei knap êdimi; Ơ Yêhôwa, djă pioh klei hdĭp kâo, tui si klei Ih blŭ.

¹⁰⁸Ơ Yêhôwa, brei Ih tŭ klei kâo wah lač bi mni kơ Ih, leh anăn bi hriăm kâo klei Ih mtă.

¹⁰⁹Grăp hruê klei hdĭp kâo dôk nanao hlăm klei huĭ mpŭ; ƀiădah kâo amâo wơr bĭt ôh klei bhiăn Ih.

¹¹⁰Phung ƀai ƀêč leh kđông kơ kâo, ƀiădah kâo amâo weh mơ̆ng klei Ih mtă ôh.

¹¹¹Klei Ih hưn jing ngăn dưn kơ kâo hlŏng lar; sĭt nik diñu jing klei bi mơak kơ ai tiê kâo.

¹¹²Kâo čuăn leh ai tiê kâo tui gưt klei bhiăn Ih nanao tơl knhal tuč.

¹¹³Kâo bi êmut kơ mnuih mâo klei mĭn dua nah; ƀiădah kâo khăp kơ klei bhiăn Ih.

¹¹⁴Ih jing anôk kâo đuĕ dăp leh anăn khil kâo; kâo čang hmăng hlăm klei Ih blŭ.

¹¹⁵Đuĕ bĕ mơ̆ng kâo, Ơ phung ƀai, čiăng kơ kâo dưi djă pioh klei Aê Diê kâo mtă!

¹¹⁶Krơ̆ng kâo tui si klei Ih ƀuăn, čiăng kơ kâo dưi dôk hdĭp; leh anăn đăm brei kâo hêñ ôh hlăm klei kâo čang hmăng.

¹¹⁷Djă krơ̆ng kâo čiăng kơ kâo dưi mâo klei hơĭt, leh anăn mpŭ nanao kơ klei bhiăn Ih.

¹¹⁸Ih hngah leh kơ jih jang phung weh đuĕ mơ̆ng klei bhiăn Ih; sĭt nik klei diñu mnêč jing hơăi mang.

¹¹⁹Ih yap jih jang phung ƀai ti lăn ala msĕ si djah; kyuanăn kâo khăp kơ klei Ih hưn.

¹²⁰Kđeh kâo ktư̆ yơ̆ng kyua huĭ kơ Ih; leh anăn kâo huĭ kơ klei Ih phat kđi.

¹²¹Kâo ngă leh klei djŏ leh anăn klei kpă ênô; Đăm jao kâo kơ phung ktư̆ juă kâo ôh.

¹²²Brei Ih kiă kriê dĭng buăl Ih hŏng klei jăk; đăm brei phung mgao ktư̆ juă kâo ôh.

¹²³Ală kâo dliu êjai dôk guôn klei Ih bi mtlaih, leh anăn klei Ih ƀuăn kpă ênô.

¹²⁴Brei Ih ngă hŏng dĭng buăl Ih tui si klei khăp Ih, leh anăn bi hriăm kâo klei bhiăn Ih.

¹²⁵Kâo jing dĭng buăl Ih; brei kơ kâo klei thâo săng, čiăng kơ kâo dưi thâo săng klei Ih hưn.

¹²⁶Truh leh mông Ih mă bruă, Ơ Yêhôwa, kyuadah arăng gao leh klei bhiăn Ih.

¹²⁷Sĭt nik kâo khăp kơ klei Ih mtă êgao hĭn kơ mah leh anăn mah doh.

¹²⁸Sĭt nik kâo tui hlue jih klei Ih čih; Kâo bi êmut kơ jih jang êlan klei luar.

¹²⁹Klei Ih hưn jing yuôm bhăn; snăn kâo djă pioh diñu.

¹³⁰Klei mblang klei Ih blŭ brei klei mngač; ñu brei klei thâo săng kơ phung hơăi mang.

¹³¹Kâo ha ƀăng êgei, ƀhŭp ƀhăp; kyuadah kâo mhao snăk kơ klei Ih mtă.

¹³²Wir bĕ phă kâo, leh anăn pap mñai kơ kâo đa, tui si klei Ih bhiăn ngă kơ phung khăp kơ anăn Ih.

¹³³Bi kjăp knhuang kâo tui si klei Ih ƀuăn; leh anăn đăm brei sa mta klei wê kiă kriê kâo ôh.

¹³⁴Bi tui kâo mơ̆ng phung mnuih ktư̆ juă; čiăng kơ kâo dưi tui hlue klei Ih mtă.

¹³⁵Brei Ih mtrang ƀô̆ mta Ih ti dĭng buăl Ih, leh anăn bi hriăm kâo klei bhiăn Ih.

¹³⁶Êa ală kâo ƀlĕ msĕ si êa hnoh, kyuadah phung mnuih amâo gưt ôh kơ klei bhiăn Ih.

¹³⁷Ơ Yêhôwa, Ih jing kpă ênô; leh anăn klei Ih phat kđi jing djŏ.

¹³⁸Ih mtă leh klei Ih hưn hŏng klei kpă ênô leh anăn năng knang sĭt.

¹³⁹Klei hur har kâo čuh ai ngêñ kâo, kyuadah phung roh kâo wơr bĭt klei Ih blŭ.

¹⁴⁰Leh klei lông dlăng, klei Ih blŭ jing doh sĭt; kyuanăn dĭng buăl Ih khăp kơ ñu.

¹⁴¹Kâo jing điêt leh anăn arăng bi êmut, ƀiădah ăt kâo amâo wơr bĭt ôh klei Ih mtă.

¹⁴²Klei kpă ênô Ih jing klei kpă ênô hlŏng lar, leh anăn klei bhiăn Ih jing sĭt nik.

¹⁴³Klei rŭng răng leh anăn klei ênguôt truh leh kơ kâo, ƀiădah klei Ih mtă bi mơak kơ kâo.

¹⁴⁴Klei Ih hưn jing kpă ênô hlŏng lar; brei kơ kâo klei thâo săng čiăng kơ kâo dưi dôk hdĭp.

¹⁴⁵Ơ Yêhôwa, kâo iêô wah lač kơ Ih hŏng jih ai tiê; brei Ih lŏ wĭt lač kơ kâo, kâo srăng tui gưt klei bhiăn Ih.

¹⁴⁶Kâo iêô wah lač kơ Ih; bi mtlaih kâo bĕ, čiăng kơ kâo dưi tui hlue klei Ih hưn.

¹⁴⁷Kâo kgŭ êlâo kơ ang dar leh anăn kwưh klei đru; kâo čang hmăng hlăm klei Ih blŭ.

¹⁴⁸Kâo krŏng ală êjai mông gak mlam; čiăng kâo dưi dôk ksiêm mĭn kơ klei Ih ƀuăn.

¹⁴⁹Dôk hmư̆ asăp kâo tui si klei khăp Ih, Ơ Yêhôwa, tui si klei kpă Ih bi mrâo klei hdĭp kâo.

¹⁵⁰Phung ƀai tiŏ ngă klei jhat hriê giăm leh; diñu dôk kbưi mơ̆ng klei bhiăn Ih.

¹⁵¹Ƀiădah Ih dôk giăm, Ơ Yêhôwa, leh anăn jih jang klei mtă Ih jing sĭt nik.

¹⁵²Mơ̆ng sui leh kâo thâo săng klei Ih hưn, Ih yơh mdơ̆ng digơ̆ hlŏng lar.

¹⁵³Dlăng kơ klei knap mñai kâo, leh anăn bi mtlaih kâo, kyuadah kâo amâo wơr bĭt ôh klei bhiăn Ih.

¹⁵⁴Mgang klei kâo, leh anăn bi tui kâo, bi mrâo klei hdĭp kâo tui si klei ƀuăn Ih.

¹⁵⁵Klei bi mtlaih dôk kbưi mơ̆ng phung ƀai, kyuadah diñu amâo duah klei bhiăn Ih ôh.

¹⁵⁶Ơ Yêhôwa, klei Ih pap jing prŏng; bi mrâo klei hdĭp kâo tui si klei bhiăn Ih.

¹⁵⁷Phung ngă jhat kơ kâo leh anăn phung roh hŏng kâo jing lu, ƀiădah kâo amâo weh ôh mơ̆ng klei Ih hưn.

¹⁵⁸Ƀuh phung lhiăr, kâo bi êmut kheh; kyuadah diñu amâo tui hlue klei Ih mtă ôh.

¹⁵⁹Dôk mĭn bĕ kơ klei kâo khăp kơ klei Ih čih; bi hdĭp kâo, Ơ Yêhôwa, tui si klei khăp Ih.

¹⁶⁰Jih jang klei Ih blŭ jing sĭt nik; djăp mta klei Ih mtă jing kpă ênô leh anăn dôk hlŏng lar.

¹⁶¹Phung khua ngă jhat kơ kâo amâo mâo klei, ƀiădah ai tiê kâo huĭ knŏng kơ klei Ih blŭ.

¹⁶²Kâo hơ̆k mơak kyua klei ƀuăn Ih, msĕ si pô plah mă lu ngăn hlăm klei bi blah.

¹⁶³Kâo bi êmut êdi kơ klei luar, ƀiădah kâo khăp kơ klei bhiăn Ih.

¹⁶⁴Kâo bi mni kơ Ih kjuh blư̆ grăp hruê, kyua klei bhiăn Ih jing djŏ.

¹⁶⁵Phung khăp kơ klei bhiăn Ih mâo klei êđăp ênang prŏng; amâo mâo mnơ̆ng dưi bi têč hnêč diñu ôh.

¹⁶⁶Ơ Yêhôwa, kâo čang hmăng kơ klei bi mtlaih Ih; leh anăn kâo ngă klei mtă Ih.

¹⁶⁷Mngăt kâo gưt kơ klei Ih hưn, leh anăn kâo khăp snăk kơ diñu.

¹⁶⁸Kâo djă pioh klei Ih mtă leh anăn klei Ih hưn, kyuadah jih jang êlan kâo dôk ti anăp Ih sơăi.

¹⁶⁹Ơ Yêhôwa, brei klei kâo krao truh kơ Ih; brei kơ kâo klei thâo săng tui si klei Ih blŭ.

¹⁷⁰Brei klei kâo kwưh truh kơ Ih; bi mtlaih kâo tui si klei Ih ƀuăn.

¹⁷¹Brei ƀăng kƀông kâo hưn klei bi mni, kyuadah Ih bi hriăm kâo klei bhiăn Ih.

¹⁷²Brei êlah kâo mmuñ kơ klei Ih blŭ, kyuadah jih jang klei Ih mtă jing kpă ênô.

¹⁷³Brei kngan Ih kăp đru kâo, kyuadah kâo ruah leh klei Ih mtă.

¹⁷⁴Kâo hmăng kơ klei Ih bi mtlaih, Ơ Yêhôwa, leh anăn kâo khăp kơ klei bhiăn Ih.

¹⁷⁵Brei kâo dôk hdĭp čiăng kơ mngăt dưi bi mni kơ Ih, leh anăn brei klei Ih mtă đru kâo.

¹⁷⁶Kâo klah đuĕ msĕ si sa drei biăp luč; duah bĕ dĭng buăl Ih, kyuadah kâo amâo wơr bĭt ôh klei Ih mtă.