Read Rade Klei Mmuñ Hđăp 137 Bible Online

Klei Mmuñ Hđăp 137 - Rade bible

Klei Mmuñ Hđăp 137

¹Ti hang êa krông Ƀaƀilôn hmei dôk gŭ leh anăn hia, tơdah hmei hdơr kơ ƀuôn Siôn.

²Ti kyâo sôl ti hang êa krông anăn hmei kƀăk hĕ brô̆ hmei.

³Tinăn phung dưi hŏng hmei brei hmei mmuñ, leh anăn phung ktư̆ juă hmei brei hmei bi mơak kơ diñu, lač, “Mmuñ bĕ kơ hmei sa klei mmuñ ƀuôn Siôn.”

⁴Si hmei dưi mmuñ klei mmuñ Yêhôwa hlăm čar phung tue?

⁵Tơdah kâo wơr bĭt ih, Ơ ƀuôn Yêrusalem, brei kngan hnuă kâo luč klei mbruă ñu.

⁶Brei êlah kâo tlĭp hŏng êhưl kâo, tơdah kâo amâo hdơr kơ ih ôh, tơdah kâo amâo yap ôh ƀuôn Yêrusalem jing yuôm hĭn kơ jih klei hơ̆k mơak kâo.

⁷Ơ Yêhôwa, brei Ih hdơr čiăng rŭ ênua kơ phung anak čar Êđôm. Hlăm hruê ƀuôn Yêrusalem lĕ diñu lač, “Bi rai hĕ ñu, bi rai hĕ ñu, tơl truh ti atur ñu.”

⁸Ơ anak mniê Ƀaƀilôn, pô arăng srăng bi rai, jăk mơak yơh kơ pô srăng bi wĭt kơ ih tui si klei jhat ih ngă leh kơ hmei.

⁹Jăk mơak yơh pô srăng mă phung hđeh điêt ih, leh anăn poh bi mdjiê diñu ti boh tâo.