Read Rade Klei Mmuñ Hđăp 139 Bible Online

Klei Mmuñ Hđăp 139 - Rade bible

Klei Mmuñ Hđăp 139

¹Kơ khua phung mmuñ. Klei mmuñ hđăp Y-Đawit. Ơ Yêhôwa, Ih ksiêm dlăng leh kâo leh anăn thâo kral kâo.

²Ih thâo tơdah kâo dôk gŭ leh anăn tơđah kâo kgŭ. Mơ̆ng kbưi Ih thâo săng klei kâo mĭn.

³Ih ksiêm êlan kâo êbat leh anăn klei kâo đih, leh anăn Ih thâo kral leh jih klei kâo ngă.

⁴Êlâo kơ êlah kâo blŭ, nĕ anei, Ơ Yêhôwa, Ih thâo leh klei kâo srăng blŭ anăn.

⁵Ih dôk jŭm kâo, ti tluôn wăt ti anăp; leh anăn Ih dưm kngan Ih ti kâo.

⁶Klei thâo mĭn msĕ snăn jing yuôm bhăn snăk kơ kâo; ñu dlông, êgao hĭn kơ klei kâo dưi tơl.

⁷Ti anôk kâo dưi đuĕ mơ̆ng Mngăt Myang Ih? Amâodah ti anôk kâo dưi êran đuĕ mơ̆ng ƀô̆ mta Ih?

⁸Tơdah kâo đĭ ti adiê, Ih dôk tinăn; tơdah kâo đih hlăm Ƀuôn Phung Djiê, Ih tinăn mơh.

⁹Tơdah kâo mă siap aguah ưm ti ngŏ, leh anăn phiơr nao dôk ti knhal êa ksĭ, ti yŭ

¹⁰wăt tinăn mơh kngan Ih srăng atăt kâo, leh anăn kngan hnuă Ih srăng krơ̆ng kâo.

¹¹Tơdah kâo lač: “klei mmăt srăng guôm kâo, leh anăn klei mngač jŭm kâo jing hĕ mlam”,

¹²wăt klei mmăt amâo thâo mdăp mnơ̆ng kơ Ih; ƀiădah mlam mtrang msĕ si hruê, kyuadah klei mmăt jing msĕ si klei mngač ti anăp Ih.

¹³Ih yơh Pô mjing leh jih kdrêč hlăm lam kâo; Ih mñam kâo leh hlăm tian amĭ kâo.

¹⁴Kâo bi mni kơ Ih kyua Ih hrih mjing kâo hŏng klei yuôm bhăn leh anăn klei bi kngăr. Bruă Ih jing yuôm bhăn, kâo thâo klei anăn sĭt nik.

¹⁵Klang kâo amâo hgăm ôh kơ Ih, tơdah Ih mjing kâo hlăm anôk hgăm, mñam kâo hlăm anôk êlam ti lăn ala.

¹⁶Êlâo kơ asei mlei kâo jing, ală Ih ƀuh leh kâo; leh anăn Ih čih leh ti hdruôm hră Ih dŭm hruê bi kčah leh kơ kâo, êlâo kơ kâo ƀuh sa hruê hlăm hruê anăn.

¹⁷Ơ Aê Diê, klei mĭn Ih yuôm snăk kơ kâo! Leh anăn diñu jing lu êdimima!

¹⁸Tơdah kâo dưi yap diñu, diñu jing lu hĭn kơ asăr čuah. Tơdah kâo mdih, kâo ăt dôk mbĭt hŏng Ih.

¹⁹Ơ Aê Diê, kâo čiăng snăk kơ Ih bi mdjiê phung ƀai! Ơ phung tuh êrah, đuĕ bĕ mơ̆ng kâo!

²⁰Diñu blŭ bi kdơ̆ng hŏng Ih čiăng ngă kơ Ih; phung roh Ih yua anăn Ih hŏng klei hlăp.

²¹Ơ Yêhôwa, amâo djŏ hĕ kâo bi êmut kơ phung bi êmut kơ ih? Leh anăn amâo djŏ hĕ kâo bi êmut kheh kơ phung kgŭ bi kdơ̆ng hŏng Ih?

²²Kâo bi êmut êdimi kơ diñu; kâo yap diñu jing phung roh kâo.

²³Ksiêm dlăng kâo bĕ, Ơ Aê Diê, leh anăn thâo kral ai tiê kâo; lông dlăng kâo, leh anăn thâo kral klei mĭn kâo.

²⁴Dlăng bĕ thâodah kâo tui êlan jhat ƀai, leh anăn atăt kâo ti êlan dôk nanao hlŏng lar.