Read Rade Klei Mmuñ Hđăp 14 Bible Online

Klei Mmuñ Hđăp 14 - Rade bible

Klei Mmuñ Hđăp 14

¹Kơ khua phung mmuñ. Klei mmuñ hđăp Y-Đawit. Mnuih khŏ lač hlăm ai tiê diñu, “Amâo mâo Aê Diê ôh.” Diñu mâo knuih brŭ, diñu ngă bruă jŭ jhat; amâo mâo sa čô ôh ngă klei jăk.

²Mơ̆ng adiê ti dlông Yêhôwa dlăng kơ phung anak mnuih, čiăng ƀuh thâodah mâo mnuih thâo săng, leh anăn duah Aê Diê.

³Jih jang diñu klah đuĕ leh; jih jang diñu soh leh; amâo mâo pô ngă klei jăk ôh, sa čô kăn mâo rei.

⁴Jih jang phung ngă klei wê amâo mâo klei thâo săng hĕ? Diñu lun ƀơ̆ng phung ƀuôn sang Kâo msĕ si ƀơ̆ng kpŭng, leh anăn amâo iêô wah lač kơ Yêhôwa ôh.

⁵Ƀiădah diñu srăng mâo klei huĭ êdimi, kyuadah Aê Diê dôk ti krah găp djuê mnuih kpă ênô.

⁶Diih bi hêñ kơ klei pô knap čang hmăng, ƀiădah Yêhôwa jing anôk gơ̆ kđap.

⁷Ơ čiăng snăk kơ klei bi mtlaih phung Israel srăng kbiă mơ̆ng Siôn! Tơdah Yêhôwa srăng atăt wĭt phung ƀuôn sang Ñu mơ̆ng klei jing hlŭn mnă, hlăk anăn phung Yakôp srăng mơak, phung Israel srăng hơ̆k kdơ̆k.