Read Rade Klei Mmuñ Hđăp 140 Bible Online

Klei Mmuñ Hđăp 140 - Rade bible

Klei Mmuñ Hđăp 140

¹Kơ khua phung mmuñ. Klei mmuñ hđăp Y-Đawit. Ơ Yêhôwa, bi mtlaih kâo mơ̆ng phung ƀai; mgang kâo mơ̆ng mnuih jhŏng ƀai.

²Hlăm ai tiê diñu trông čhai klei čiăng ngă jhat, diñu mtrŭt kơ klei bi blah nanao.

³Êlah diñu ƀơ̆ng msĕ si êlah ala; diñu mâo êa kêč kam ala kpơ̆ng ti gŭ kƀuê diñu. (Sêla)

⁴Ơ Yêhôwa, răng kriê kâo mơ̆ng kngan phung ƀai; mgang kâo mơ̆ng mnuih jhŏng ƀai, mơ̆ng phung mĭn čiăng bi êbuh kâo.

⁵Phung mgao ƀêč kđông leh anăn dăng ñuăl čiăng bi djŏ kơ kâo; diñu dưm knuê̆ giăm êlan. (Sêla)

⁶Kâo lač kơ Yêhôwa, “Ih jing Aê Diê kâo: Ơ Yêhôwa, mđing knga kơ asăp kâo kwưh kơ Ih.”

⁷Ơ Yêhôwa, Khua Yang kâo, Pô ktang bi mtlaih kâo, Pô guôm mgang boh kŏ kâo ti hruê bi blah.

⁸Ơ Yêhôwa, đăm brei truh ôh klei phung ƀai čiăng; đăm brei klei diñu čuăn ngă dưi, huĭdah diñu jing mgao. (Sêla)

⁹Bi kơ phung wang jŭm kâo ngă hŏng klei mgao, brei klei jhat diñu blŭ lŏ lĕ kơ boh kŏ diñu pô.

¹⁰Brei hdăng ngur lĕ ti dlông diñu; brei arăng dlăm diñu hlăm ƀăng êlam amâo dưi lŏ kbiă ôh.

¹¹Đăm brei pô mčeh luar dôk kjăp hlăm čar ôh; leh anăn brei klei jhat tiŏ amâo mdei mnuih jhŏng ƀai čiăng bi luč ñu.

¹²Kâo thâo kơ Yêhôwa srăng mgang phung knap, leh anăn ngă klei djŏ kơ phung ƀun ƀin.

¹³Sĭt nik phung kpă ênô srăng bi mni kơ anăn Ih; phung kpă ênuah srăng dôk ti anăp Ih.