Read Rade Klei Mmuñ Hđăp 141 Bible Online

Klei Mmuñ Hđăp 141 - Rade bible

Klei Mmuñ Hđăp 141

¹Klei mmuñ hđăp Y-Đawit. Ơ Yêhôwa, kâo iêô wah lač kơ ih; hriê kơ kâo djăl. Mđing knga bĕ kơ asăp kâo tơdah kâo iêô wah lač kơ ih.

²Brei ih yap klei kâo wah lač jing msĕ si mnơ̆ng ƀâo mngưi ti anăp ih; leh anăn klei kâo yơr kngan phă ih jing msĕ si mnơ̆ng myơr tlam.

³Ơ Yêhôwa, kiă kriê ƀăng êgei kâo; răng kơ kƀuê kâo tơdah ñu ha.

⁴Đăm brei ai tiê kâo khăp kơ klei jhat ôh, čiăng ngă klei ƀai mbĭt hŏng phung mnuih ngă klei wê; leh anăn đăm brei kâo ƀơ̆ng ôh mnơ̆ng yuôm diñu.

⁵Brei pô kpă čăm kâo: klei anei jing jăk; brei ñu ƀuah kâo: anei jing êa mñak ti boh kŏ kâo. Boh kŏ kâo amâo hngah klei anăn ôh. Ƀiădah klei kâo wah lač bi kdơ̆ng nanao hŏng bruă ngă phung ƀai.

⁶Arăng srăng dlăm phung khua diñu ti ping boh tâo, snăn phung ƀai srăng thâo klei kâo blŭ jing sĭt.

⁷Msĕ si arăng kai hma msĕ snăn mơh arăng srai klang diñu ti ƀăng jang Ƀuôn Phung Djiê.

⁸Ƀiădah ală kâo dlăng phă ih, Ơ Yêhôwa, Khua Yang kâo; kâo đuĕ dăp hlăm ih, đăm lui hĕ mngăt kâo ôh.

⁹Mgang kâo mơ̆ng kđông diñu ƀêč leh kơ kâo, mơ̆ng ñuăl phung ngă jhat kăp ngă kơ kâo.

¹⁰Brei phung ƀai lĕ hlăm ñuăl diñu pô, ƀiădah kâo tlaih.