Read Rade Klei Mmuñ Hđăp 147 Bible Online

Klei Mmuñ Hđăp 147 - Rade bible

Klei Mmuñ Hđăp 147

¹Bi mni kơ Yêhôwa, kyuadah jing jăk yơh mmuñ bi mni kơ Aê Diê drei, kyuadah Ñu thâo pap, snăn djŏ leh drei bi mni kơ Ñu.

²Yêhôwa lŏ mdơ̆ng ƀuôn Yêrusalem; Ñu bi kƀĭn phung Israel bra đuĕ leh.

³Ñu bi hlao phung mâo ai tiê mčah, leh anăn Ñu păn anôk êka digơ̆.

⁴Ñu čuăn leh dŭm asăr mtŭ, Ñu bi anăn leh jih jang digơ̆.

⁵Khua Yang drei jing prŏng leh anăn bŏ hŏng klei myang, klei Ñu thâo săng amâo mâo knhal ôh.

⁶Yêhôwa lŏ bi kơrŭ phung arăng ktư̆ juă; Ñu dlăm phung ƀai ti lăn.

⁷Mmuñ bĕ kơ Yêhôwa hŏng klei bi mni; mmuñ bi mni bĕ kơ Aê Diê drei hŏng đĭng brô̆.

⁸Ñu guôm adiê hŏng knam, Ñu brei êa hjan kơ lăn ala, leh anăn brei rơ̆k čăt ti čư̆.

⁹Ñu brei mnơ̆ng ƀơ̆ng kơ hlô dliê, leh anăn kơ êđai ak tơdah digơ̆ ur.

¹⁰Ñu amâo mơak ôh hŏng klei mơai aseh, kăn mơak rei hŏng klei kahan mâo jhŏng ktang.

¹¹Ƀiădah Yêhôwa mơak hŏng phung huĭ mpŭ kơ Ñu, hŏng phung čang hmăng kơ klei khăp Ñu.

¹²Ơ ƀuôn Yêrusalem, mpŭ mni bĕ kơ Yêhôwa, Ơ ƀuôn Siôn, bi mni bĕ kơ Aê Diê ih.

¹³Kyuadah Ñu bi kjăp giê kal ƀăng jang ih; Ñu brei klei jăk jĭn kơ phung anak ih ti krah ih.

¹⁴Ñu brei klei êđăp ênang kơ čar ih; ñu bi trei ih hŏng mdiê ƀlê jăk hĭn.

¹⁵Ñu mơĭt klei Ñu mtă ti lăn ala; klei Ñu blŭ êran pral.

¹⁶Ñu brei êa pliêr msĕ si mlâo biăp; Ñu tuh klŏ êa êăt msĕ si hbâo.

¹⁷Ñu bhĭr klŏ êa êăt msĕ si êga, hlei dưi dôk ti anăp klei êăt Ñu?

¹⁸Ñu mơĭt klei Ñu mtă leh anăn bi lik digơ̆; Ñu brei angĭn Ñu thut leh anăn êa đoh.

¹⁹Ñu bi êdah klei Ñu blŭ kơ phung Yakôp, klei bhiăn Ñu leh anăn klei Ñu mtă kơ phung Israel.

²⁰Ñu amâo tuôm ngă msĕ snăn ôh hŏng găp djuê mkăn; digơ̆ amâo thâo săng ôh klei Ñu mtă. Bi mni bĕ kơ Yêhôwa!