Read Rade Klei Mmuñ Hđăp 148 Bible Online

Klei Mmuñ Hđăp 148 - Rade bible

Klei Mmuñ Hđăp 148

¹Bi mni kơ Yêhôwa. Bi mni bĕ kơ Yêhôwa mơ̆ng phung adiê, bi mni bĕ kơ Ñu hlăm phung anôk ti dlông hĭn.

²Bi mni bĕ kơ Ñu, Ơ jih jang phung dĭng buăl jăk Ñu, bi mni bĕ kơ Ñu, Ơ jih jang phung kahan Ñu hlăm adiê.

³Bi mni bĕ kơ Ñu, Ơ yang hruê leh anăn mlan, bi mni bĕ kơ Ñu, Ơ jih jang mtŭ mngač.

⁴Bi mni bĕ kơ Ñu, Ơ phung adiê ti dlông hĭn, leh anăn Ơ êa dôk ti dlông phung adiê.

⁵Brei diñu bi mni kơ anăn Yêhôwa, kyuadah Ñu mtă leh, snăn digơ̆ jing.

⁶Ñu bi kjăp digơ̆ nanao hlŏng lar, Ñu brei leh klei mtă amâo srăng êgao tuč ôh.

⁷Bi mni bĕ kơ Yêhôwa mơ̆ng lăn ala, jih jang mnơ̆ng prŏng hlăm êa ksĭ leh anăn jih jang ƀăng êlam,

⁸pui leh anăn boh tâo pliêr, êa pliêr leh anăn knam, angĭn êbŭ bi sĭt klei Ñu mtă;

⁹Jih jang čư̆ leh anăn kbuôn, ana boh leh anăn jih jang ana kyâo sêdar,

¹⁰hlô mnơ̆ng leh anăn jih jang êmô kbao, mnơ̆ng êbat ban leh anăn čĭm phiơr,

¹¹phung mtao lăn ala leh anăn jih jang phung ƀuôn sang, phung khua kiă kriê leh anăn jih jang khua phat kđi ti lăn ala,

¹²phung êkei êdam wăt phung mniê êra hrông mđrăm mbĭt, phung mduôn wăt phung hđeh!

¹³Brei diñu bi mni kơ anăn Yêhôwa, kyuadah knŏng anăn Ñu jing năng kơ klei mpŭ. Klei guh kơang Ñu dôk ti dlông lăn ala leh anăn phung adiê.

¹⁴Ñu brei klei dưi kơ phung ƀuôn sang Ñu, klei bi mni kơ jih jang phung doh jăk Ñu, kơ phung ƀuôn sang Israel, phung dôk giăm Ñu. Bi mni bĕ kơ Yêhôwa!