Read Rade Klei Mmuñ Hđăp 149 Bible Online

Klei Mmuñ Hđăp 149 - Rade bible

Klei Mmuñ Hđăp 149

¹Bi mni bĕ kơ Yêhôwa! Mmuñ bĕ kơ Yêhôwa sa klei mmuñ mrâo, mmuñ bĕ klei bi mni kơ Ñu hlăm klei bi kƀĭn phung doh jăk.

²Brei phung Israel hơ̆k mơak hŏng Pô Hrih diñu leh; brei phung anak ƀuôn Siôn hơ̆k mơak hŏng Mtao diñu.

³Brei diñu bi mni kơ anăn Yêhôwa hŏng klei kdŏ; brei diñu mmuñ kơ Gơ̆ hŏng hgơr điêt leh anăn hŏng brô̆.

⁴Kyuadah Yêhôwa mâo klei mơak hŏng phung ƀuôn sang Ñu; Ñu mprăp phung luă gŭ hŏng klei bi mtlaih.

⁵Brei phung doh jăk hơ̆k mơak hŏng klei guh kơang; brei diñu mmuñ hơ̆k ti jhưng pĭt diñu.

⁶Brei ƀăng êgei diñu bi mni kơ Aê Diê, leh anăn brei đao gưm dua nah mta dôk hlăm kngan diñu,

⁷čiăng ngă klei rŭ ênua kơ phung găp djuê mnuih, čiăng bi kmhal phung ƀuôn sang,

⁸čiăng čăp phung mtao digơ̆ hŏng klei săng đai, leh anăn phung khua digơ̆ hŏng ƀră msei,

⁹čiăng bi truh kơ digơ̆ klei phat kđi arăng čih leh. Anei jing klei guh kơang kơ jih jang phung doh jăk Ñu. Bi mni bĕ kơ Yêhôwa!