Read Rade Klei Mmuñ Hđăp 16 Bible Online

Klei Mmuñ Hđăp 16 - Rade bible

Klei Mmuñ Hđăp 16

¹Klei mmuñ hđăp Y-Đawit. Ơ Aê Diê kâo, mgang kâo bĕ, kyuadah kâo kđap hlăm Ih.

²Kâo lač kơ Yêhôwa, Ih jing Khua Yang kâo; kâo amâo mâo klei jăk ôh mơ̆ng pô mkăn.

³Phung doh jăk hlăm lăn ala jing phung arăng mpŭ, hlăm diñu kâo mâo jih klei mơak.

⁴Phung ruah tui hlue yang mkăn srăng bi lar klei ênguôt; kâo amâo srăng myơr êrah ôh kơ diñu, kâo amâo srăng blŭ anăn diñu ôh hŏng ƀăng kƀông kâo.

⁵Yêhôwa jing ngăn dưn kâo ruah leh, leh anăn atŏ kâo mnăm; Ih yơh kiă kriê klei hdĭp kâo.

⁶Knông lăn pioh kơ kâo jing siam snăk, sĭt nik kâo mâo ngăn dưn jăk.

⁷Kâo bi mni kơ Yêhôwa, pô kčĕ kơ kâo; Wăt êjai mmăt mlam ai tiê kâo mtô kơ kâo.

⁸Kâo pioh Yêhôwa ti anăp kâo nanao; kyuadah Ñu dôk tĭng hnuă kâo, kâo amâo srăng mgei ôh.

⁹Kyuanăn yơh ai tiê kâo mơak, ai mĭn kâo hơ̆k kdơ̆k; asei mlei kâo srăng dôk hơĭt hŏng klei êđăp ênang.

¹⁰Kyuadah Ih amâo srăng lui ôh mngăt kâo hlăm Ƀuôn Phung Djiê, kăn brei rei Pô Doh Jăk Ih tuôm ƀuh klei brŭ rai.

¹¹Ih brei kâo thâo bĭt leh êlan klei hdĭp; ti anăp Ih mâo klei hơ̆k mơak êbeh dlai; ti kngan hnuă Ih mâo klei jăk mơak nanao hlŏng lar.