Read Rade Klei Mmuñ Hđăp 17 Bible Online

Klei Mmuñ Hđăp 17 - Rade bible

Klei Mmuñ Hđăp 17

¹Klei Y-Đawit wah lač. Ơ Yêhôwa, dôk hmư̆ klei djŏ, dôk hmư̆ bi nik kơ klei kâo ur! Mđing knga Ih kơ klei kâo wah lač hŏng ƀăng kƀông amâo mâo klei mplư ôh!

²Brei Ih yơh phat kđi kâo! kyuadah knŏng ală Ih ƀuh klei sĭt nik!

³Ih čhưn leh hŏng kâo êjai mlam, Ih ksiêm leh ai tiê kâo, Ih lông dlăng kâo leh, ƀiădah Ih amâo ƀuh klei jhat ôh; kâo čuăn leh ƀăng kƀông kâo amâo srăng blŭ soh ôh.

⁴Kâo ƀuh leh bruă phung mnuih ngă, hŏng klei kâo knang kơ klei blŭ mơ̆ng ƀăng kƀông Ih kâo mgang kâo pô kơ êlan phung jhŏng ƀai.

⁵Knhuang kâo kjăp leh hlăm êlan Ih, jơ̆ng kâo amâo ksak ôh.

⁶Kâo wah lač kơ Ih, Ơ Aê Diê, kyuadah Ih srăng lŏ wĭt lač kơ kâo; mđing knga Ih kơ kâo, dôk hmư̆ bĕ klei kâo wah lač.

⁷Bi êdah klei khăp sĭt suôr yuôm bhăn Ih; hŏng kngan hnuă Ih, Ih bi mtlaih phung đuĕ dăp hlăm Ih mơ̆ng phung roh diñu.

⁸Mgang kâo msĕ si asăr ală Ih pô; mdăp kâo ti gŭ êyui siap Ih,

⁹mơ̆ng phung jhat ƀai ktư̆ juă kâo, mơ̆ng phung roh ngêñ snăk dôk wang kâo.

¹⁰Diñu kđăl ai tiê diñu kơ klei pap; ƀăng kƀông diñu blŭ mgao.

¹¹Diñu tiŏ hmao kâo leh anăn wang jŭm kâo leh; diñu kăp čiăng bi êbuh kâo ti lăn.

¹²Diñu jing msĕ si êmông gu êpa čiăng hiêk ƀơ̆ng, msĕ si êđai êmông gu dôk kăp lua hlăm anôk hgăm.

¹³Ơ Yêhôwa, kgŭ bĕ Ih, nao ngă kơ diñu, bi êbuh diñu! Hŏng đao gưm Ih, brei Ih bi mtlaih kâo mơ̆ng phung ƀai.

¹⁴Ơ Yêhôwa, hŏng kngan Ih bi mtlaih kâo mơ̆ng phung mnuih, mơ̆ng phung mnuih ti lăn ala anei, Phung Ih bi bŏ tian hŏng ngăn yuôm Ih; diñu mơak kyua phung anak diñu leh anăn lui mnơ̆ng êbeh dlai diñu kơ phung anak čô diñu.

¹⁵Bi kâo dê, kâo srăng ƀuh ƀô̆ mta Ih kyua klei kpă ênô kâo; tơdah kâo mdih pĭt, kâo srăng mơak hŏng klei kâo ƀuh Ih.