Read Rade Klei Mmuñ Hđăp 19 Bible Online

Klei Mmuñ Hđăp 19 - Rade bible

Klei Mmuñ Hđăp 19

¹Kơ khua phung mmuñ. Klei mmuñ hđăp Y-Đawit. Phung adiê yăl dliê klei guh kơang Aê Diê; leh anăn êngĭt hưn bruă kngan Ñu.

²Hruê anei blŭ mtô kơ hruê êdei, mlam anei brei klei thâo săng kơ mlam êdei.

³Amâo djŏ klei blŭ ôh, kăn djŏ boh blŭ rei; arăng amâo hmư̆ ôh asăp diñu.

⁴Ƀiădah asăp diñu truh tar ƀar lăn ala, boh blŭ diñu truh ti knhal lăn ala. Tinăn Ñu ngă sang čhiăm kơ yang hruê;

⁵yang hruê jing msĕ si sa čô ung kbiă mơ̆ng adŭ ñu, hung kơ bruă ñu msĕ si sa čô mnuih ktang.

⁶Ñu ƀlĕ mơ̆ng sa knhal adiê, leh anăn bi tuč klei ñu êran ti sa knhal mkăn; amâo mâo mnơ̆ng dưi đuĕ dăp mơ̆ng mđiă ñu ôh.

⁷Klei bhiăn Yêhôwa jing klă, ñu lŏ bi hdĭp mngăt; klei Yêhôwa hưn jing kjăp sĭt, ñu bi knhâo phung mluk.

⁸Klei Yêhôwa mtrŭn jing kpă, ñu bi mơak ai tiê; klei Yêhôwa mtă jing doh, ñu bi mngač ală arăng.

⁹Klei huĭ mpŭ kơ Yêhôwa jing doh, ñu dôk nanao hlŏng lar; klei Yêhôwa mtrŭn jing sĭt nik, leh anăn djŏ sơăi.

¹⁰Diñu yuôm hĭn kơ mah, kơ lu mah điêt aruăt; diñu mmih hĭn kơ êa hnuê, êa hnuê rôč mơ̆ng ksing.

¹¹Wăt diñu brei dĭng buăl Ih thâo răng; hlei pô djă pioh diñu mâo klei mưn prŏng snăk.

¹²Ƀiădah hlei dưi thâo săng klei soh ñu? Pap brei kơ kâo kơ ya klei soh kâo amâo thâo ôh.

¹³Mgang dĭng buăl Ih mơ̆ng klei soh čŏng čiăng; đăm brei klei soh anăn ktư̆ juă kâo ôh! Snăn kâo srăng jing kpă, êngeh mơ̆ng jih klei soh prŏng.

¹⁴Brei boh blŭ mơ̆ng ƀăng êgei kâo leh anăn klei mĭn mơ̆ng ai tiê kâo jing năng kơ Ih tŭ, Ơ Yêhôwa, Boh Tâo kâo leh anăn Pô Bi Tui kâo.