Read Rade Klei Mmuñ Hđăp 2 Bible Online

Klei Mmuñ Hđăp 2 - Rade bible

Klei Mmuñ Hđăp 2

¹Si ngă mâo klei rŭng răng hdơ̆ng phung găp djuê mnuih, leh anăn phung ƀuôn sang trông čhai kơ klei amâo yuôm ôh?

²Phung mtao lăn ala kgŭ, leh anăn phung khua bi trông čhai, čiăng bi kdơ̆ng hŏng Yêhôwa leh anăn hŏng pô ñu trôč leh êa ƀâo mngưi.

³Digơ̆ lač, “Brei drei bi tloh hĕ klei diñu kă, leh anăn hwiê hĕ mơ̆ng drei klei săng đai diñu.”

⁴Pô dôk ti jhưng mtao hlăm adiê tlao; Yêhôwa mưč kơ digơ̆.

⁵Hlăk anăn Ñu srăng ƀuah kơ digơ̆ hŏng klei Ñu ngêñ, leh anăn bi huĭ digơ̆ hŏng klei Ñu ăl ktang, lač,

⁶“Kâo mdơ̆ng leh Mtao Kâo ti dlông Siôn, čư̆ doh jăk Kâo.”

⁷Kâo srăng hưn klei Yêhôwa mtă: Ñu lač leh kơ Kâo snei, “Ih jing anak êkei Kâo; hruê anei Kâo kkiêng kơ Ih.

⁸Akâo bĕ kơ Kâo, leh anăn Kâo srăng brei phung găp djuê mnuih jing ngăn Ih dưn, anôk knhal lăn ala jing dŏ Ih.

⁹Ih srăng kiă kriê digơ̆ hŏng giê msei; leh anăn bi mčah digơ̆ msĕ si gŏ arăng mmai.”

¹⁰Snăn yơh, Ơ phung mtao, brei diih mâo klei thâo mĭn; Ơ phung khua kiă kriê lăn ala, mă tŭ bĕ klei mtô lač.

¹¹Mă bruă kơ Yêhôwa hŏng klei huĭ mpŭ leh anăn mơak bĕ diih hŏng klei ktư̆ yơ̆ng.

¹²Čŭm Anak huĭdah Ñu ăl, leh anăn diih rai luč hlăm êlan diih, kyuadah klei Ñu ngêñ srăng djăl đĭ. Jăk mơak yơh jih jang phung kđap hlăm Ñu.