Read Rade Klei Mmuñ Hđăp 20 Bible Online

Klei Mmuñ Hđăp 20 - Rade bible

Klei Mmuñ Hđăp 20

¹Kơ khua phung mmuñ. Klei mmuñ hđăp Y-Đawit. Akâo Yêhôwa lŏ wĭt lač kơ ih ti hruê knap mñai! Akâo anăn Aê Diê Y-Yakôp mgang ih!

²Akâo kơ Ñu mơĭt klei đru kơ ih mơ̆ng adŭ doh jăk Ñu, akâo Ñu krơ̆ng ih mơ̆ng ƀuôn Siôn!

³Akâo Ñu hdơr kơ jih jang mnơ̆ng ih myơr, leh anăn akâo Ñu tŭ mnơ̆ng ngă yang ih myơr čuh! (Sêla)

⁴Akâo kơ Ñu brei klei ai tiê ih čiăng, leh anăn bi truh jih klei ih mĭn ngă!

⁵Brei drei ur hŏng klei hơ̆k kyua klei ih dưi, leh anăn mđĭ čhiăm gru drei hlăm anăn Aê Diê drei! Akâo kơ Yêhôwa brei jih klei ih akâo!

⁶Kâo thâo leh Yêhôwa srăng đru pô ñu trôč leh êa ƀâo mngưi; mơ̆ng adiê anôk doh jăk Ñu, Ñu srăng lŏ wĭt lač kơ gơ̆, hŏng klei dưi myang mơ̆ng kngan hnuă Ñu.

⁷Mâo phung đa đa knang kơ êdeh, đa đa knang kơ aseh; ƀiădah hmei srăng knang kơ anăn Yêhôwa Aê Diê hmei.

⁸Diñu srăng jing awăt leh anăn lĕ buh; ƀiădah hmei srăng kgŭ dơ̆ng leh anăn dôk kjăp.

⁹Ơ Yêhôwa, bi mtlaih bĕ mtao hmei; lŏ wĭt lač kơ hmei tơdah hmei iêô.