Read Rade Klei Mmuñ Hđăp 25 Bible Online

Klei Mmuñ Hđăp 25 - Rade bible

Klei Mmuñ Hđăp 25

¹Klei mmuñ hđăp Y-Đawit. Ơ Yêhôwa, kơ Ih yơh mngăt kâo wah lač.

²Ơ Aê Diê kâo, kâo knang kơ Ih, đăm brei kâo hêñ ôh; đăm brei phung roh kâo dưi hŏng kâo ôh.

³Amâo mâo sa čô hlăm phung thâo knang kơ Ih srăng hêñ; knŏng phung khăp ngă klei ƀai yơh srăng hêñ.

⁴Ơ Yêhôwa, brei kâo thâo êlan Ih; bi hriăm kâo êlan Ih.

⁵Gai kâo hlăm klei sĭt nik Ih, leh anăn bi hriăm kâo bĕ, kyuadah Ih jing Aê Diê kơ klei bi mtlaih kâo; kâo guôn Ih jih hruê.

⁶Ơ Yêhôwa, brei Ih hdơr kơ klei Ih pap leh anăn kơ klei Ih khăp sĭt suôr, kyuadah diñu jing mơ̆ng ênuk hlŏng lar.

⁷Đăm hdơr ôh kơ klei soh kâo ngă êjai hlăk ai, amâodah klei wê kâo; hdơr kơ kâo tui si klei Ih khăp sĭt suôr, kyua klei jăk Ih, Ơ Yêhôwa!

⁸Yêhôwa jing jăk leh anăn kpă; kyuanăn Ñu bi hriăm phung soh thâo êlan Ñu.

⁹Ñu atăt phung luă gŭ hlăm klei kpă; Ñu bi hriăm phung luă gŭ êlan Ñu.

¹⁰Jih jang êlan Yêhôwa jing klei khăp sĭt suôr leh anăn klei sĭt nik, kơ phung djă pioh klei Ñu bi mguôp leh anăn klei Ñu hưn.

¹¹Kyua anăn Ih, Ơ Yêhôwa, pap brei kơ klei kâo jing soh leh, wăt tơdah klei soh kâo jing prŏng.

¹²Hlei mnuih huĭ mpŭ kơ Yêhôwa? Yêhôwa srăng bi hriăm ñu thâo êlan ñu srăng ruah.

¹³Pô anăn srăng mâo klei đĭ kyar, leh anăn phung anak ñu srăng dưn lăn čar.

¹⁴Yêhôwa bi êdah klei hgăm Ñu kơ phung huĭ mpŭ kơ Ñu, Ñu brei digơ̆ thâo kral klei Ñu bi mguôp.

¹⁵Ală kâo dlăng nanao phă Yêhôwa, kyuadah Ñu srăng bi mtlaih jơ̆ng kâo mơ̆ng ƀưi.

¹⁶Dlăng kơ kâo leh anăn pap mñai kơ kâo; kyuadah kâo dôk hjăn leh anăn knap mñai.

¹⁷Suôt hĕ klei rŭng răng mơ̆ng ai tiê kâo, bi mtlaih kâo mơ̆ng klei ênguôt hnĭng.

¹⁸Ksiêm klei knap mñai kâo leh anăn klei dleh kâo, leh anăn pap brei kơ jih jang klei soh kâo.

¹⁹Ksiêm phung roh kâo, kyuadah diñu lu, leh anăn klei diñu bi êmut snăk sơưn kơ kâo.

²⁰Kiă kriê mngăt kâo, leh anăn bi mtlaih kâo; đăm brei kâo hêñ ôh, kyua kâo đuĕ dăp hlăm Ih.

²¹Brei klei ênuah leh anăn klei kpă mgang kâo, kyuadah kâo knang kơ Ih.

²²Ơ Aê Diê, bi tui phung Israel, mơ̆ng jih klei dleh diñu.