Read Rade Klei Mmuñ Hđăp 26 Bible Online

Klei Mmuñ Hđăp 26 - Rade bible

Klei Mmuñ Hđăp 26

¹Klei mmuñ hđăp Y-Đawit. Phat kđi kâo, Ơ Yêhôwa, kyuadah kâo êbat leh hlăm klei ênuah ênô, leh anăn kâo knang leh kơ Yêhôwa, amâo lŏ đing ôh.

²Ksiêm kâo, Ơ Yêhôwa, leh anăn lông dlăng kâo; lông dlăng ai tiê kâo leh anăn klei mĭn kâo.

³Kyuadah klei Ih khăp dôk ti anăp ală kâo, leh anăn kâo êbat ti anăp Ih hŏng klei sĭt suôr.

⁴Kâo amâo dôk gŭ ôh mbĭt hŏng phung luar; kăn kâo hiu rei mbĭt hŏng phung ai ngăm.

⁵Kâo bi êmut klei phung ngă jhat bi kƀĭn, kâo amâo srăng dôk gŭ mbĭt hŏng phung ƀai ôh.

⁶Kâo rao leh kngan kâo hlăm klei êngeh, leh anăn kâo êbat jŭm dar knưl ngă yang Ih, Ơ Yêhôwa,

⁷êjai mmuñ bi mni kơ Ih, leh anăn yăl dliê jih bruă yuôm bhăn Ih ngă.

⁸Ơ Yêhôwa, kâo khăp kơ sang anôk Ih dôk, jing anôk mâo klei guh kơang Ih.

⁹Đăm mă mđuĕ mngăt kâo ôh mbĭt hŏng phung soh, kăn bi mdjiê kâo rei mbĭt hŏng phung tuh êrah.

¹⁰Kngan diñu ngă klei ƀai nanao, leh anăn kngan hnuă diñu bŏ hŏng ngăn sun.

¹¹Bi kâo, kâo êbat hlăm klei ênuah; bi tui kâo, leh anăn pap brei kơ kâo.

¹²Jơ̆ng kâo dôk hlăm anôk dap; kâo srăng bi mni kơ Yêhôwa hlăm klei bi kƀĭn prŏng.