Read Rade Klei Mmuñ Hđăp 27 Bible Online

Klei Mmuñ Hđăp 27 - Rade bible

Klei Mmuñ Hđăp 27

¹Klei mmuñ hđăp Y-Đawit. Yêhôwa jing klei mngač kâo leh anăn klei bi mtlaih kâo; kơ hlei pô kâo srăng huĭ? Yêhôwa jing anôk kâo kđap; kơ hlei pô kâo srăng huĭ?

²Tơdah phung ƀai hriê ngă čiăng bi mdjiê kâo, phung roh kâo anăn yơh srăng têč hnêč leh anăn êbuh.

³Wăt tơdah sa phung kahan lu dôk wang kâo, ai tiê kâo amâo srăng huĭ ôh; Wăt tơdah klei bi blah truh kơ kâo, ăt kâo mâo klei knang kơ Ih mơh.

⁴Sa mta klei kâo akâo leh kơ Yêhôwa, klei anăn kâo srăng duah; jing klei dôk hlăm sang Yêhôwa jih jang hruê kâo dôk hdĭp, čiăng dlăng klei siam Yêhôwa, leh anăn čiăng duah Ñu hlăm sang yang Ñu.

⁵Kyuadah ti hruê knap mñai Ñu srăng brei kâo kđap hlăm anôk Ñu dôk; Ñu srăng mdăp kâo hlăm sang čhiăm Ñu, Ñu srăng brei kâo dôk hơĭt ti dlông boh tâo.

⁶Ară anei Ñu srăng bi mđĭ kâo ti dlông hĭn kơ phung roh dôk jŭm kâo; leh anăn kâo srăng myơr mnơ̆ng ngă yang hlăm sang čhiăm Ñu hŏng klei ur hơ̆k; kâo srăng mmuñ leh anăn bi mni kơ Yêhôwa.

⁷Ơ Yêhôwa, dôk hmư̆ kâo tơdah kâo iêô wah lač kơ Ih, pap mñai kơ kâo, leh anăn lŏ wĭt lač kơ kâo.

⁸Ai tiê kâo lač kơ Ih, “Duah bĕ ƀô̆ mta Ñu”. “Kâo srăng duah ƀô̆ mta Ih, Ơ Yêhôwa.”

⁹Đăm mdăp ôh ƀô̆ mta Ih kơ kâo. Đăm hngah ôh kơ dĭng buăl Ih hŏng klei ngêñ; Ih jing leh Pô đru kâo, Đăm suôt kâo, leh anăn đăm lui kâo ôh, Ơ Aê Diê Pô bi mtlaih kâo!

¹⁰Wăt tơdah amĭ ama kâo lui kâo, Yêhôwa srăng jum kâo.

¹¹Ơ Yêhôwa, mtô êlan Ih kơ kâo; atăt kâo hlăm êlan kpă kyua phung roh kâo.

¹²Đăm jao kâo kơ klei phung roh kâo čiăng ôh; kyuadah phung mčeh kgŭ kčŭt kơ kâo, leh anăn diñu arưp aram srăng ngă kơ kâo.

¹³Kâo đăo kâo srăng ƀuh klei jăk Yêhôwa ti lăn ala phung hdĭp!

¹⁴Čang guôn bĕ kơ Yêhôwa; brei Ih jing ktang leh anăn jhŏng; Sĭt yơh, dôk guôn bĕ kơ Yêhôwa.