Read Rade Klei Mmuñ Hđăp 33 Bible Online

Klei Mmuñ Hđăp 33 - Rade bible

Klei Mmuñ Hđăp 33

¹Ơ phung kpă, mmuñ mơak bĕ diih kơ Yêhôwa! Jing djŏ phung kpă blŭ klei hơêč hmưi.

²Bi mni kơ Yêhôwa hŏng đĭng brô̆, mmuñ bi mni bĕ kơ Ñu hŏng đĭng brô̆ mâo pluh aruăt klei!

³Mmuñ mpŭ kơ Ñu hŏng klei mmuñ mrâo, brei diih pĕ đĭng hŏng klei mbruă leh anăn ur driâo.

⁴Kyuadah klei Yêhôwa blŭ jing kpă; leh anăn Ñu ngă jih jang bruă Ñu hŏng klei sĭt suôr.

⁵Ñu khăp kơ klei kpă leh anăn klei djŏ; lăn ala bŏ hŏng klei Yêhôwa khăp sĭt suôr.

⁶Yêhôwa hrih phung adiê hŏng klei Ñu blŭ, leh anăn jih jang mnơ̆ng hŏng êwa mơ̆ng ƀăng êgei Ñu.

⁷Ñu bi kƀĭn êa hlăm êa ksĭ msĕ si hlăm sa boh giêt êa; Ñu dưm êa êlam hlăm anôk pioh diñu.

⁸Brei jih jang lăn ala huĭ kơ Yêhôwa, brei jih jang mnuih dôk hlăm lăn ala huĭ mpŭ kơ Ñu.

⁹Kyuadah Ñu blŭ, snăn mâo mnơ̆ng; Ñu mtă, snăn gơ̆ jing kjăp.

¹⁰Yêhôwa bi luč klei phung găp djuê mnuih kčĕ; Ñu amâo brei truh ôh klei phung ƀuôn sang mĭn čiăng ngă.

¹¹Ƀiădah klei Yêhôwa čuăn dôk hlŏng lar, klei ai tiê Ñu mĭn dôk hlăm jih jang ênuk.

¹²Jăk mơak yơh găp djuê mâo Yêhôwa jing Aê Diê diñu, jăk mơak yơh phung ƀuôn sang Ñu ruah leh jing ngăn dưn Ñu pô.

¹³Yêhôwa dlăng mơ̆ng adiê ti dlông, Ñu ƀuh jih jang anak mnuih;

¹⁴mơ̆ng anôk Ñu dôk kiă kriê, Ñu ksiêm dlăng jih jang phung dôk ti lăn ala.

¹⁵Ñu yơh mjing ai tiê grăp čô digơ̆, leh anăn Ñu ksiêm jih jang bruă digơ̆ ngă.

¹⁶Sa čô mtao amâo mâo klei bi mtlaih ôh kyua kahan ñu lu; sa čô kahan ktang amâo mâo klei bi mtlaih ôh hŏng klei ktang prŏng ñu.

¹⁷Klei arăng knang kơ aseh čiăng mâo klei dưi jing hơăi mang; amâo mâo dưi bi mtlaih hŏng klei ktang prŏng gơ̆ ôh.

¹⁸Nĕ anei, ală Yêhôwa dlăng kơ phung huĭ mpŭ kơ Ñu, kơ phung knang kơ klei Ñu khăp sĭt suôr,

¹⁹čiăng kơ Ñu bi mtlaih mngăt digơ̆ mơ̆ng klei djiê, leh anăn pioh klei hdĭp digơ̆ êjai klei ư̆ êpa.

²⁰Mngăt hmei čang guôn kơ Yêhôwa; Ñu jing Pô đru leh anăn khil drei.

²¹Ơ, ai tiê hmei hơ̆k mơak hlăm Ñu, kyuadah hmei knang kơ anăn doh jăk Ñu.

²²Ơ Yêhôwa, brei klei Ih khăp sĭt suôr dôk hŏng hmei, êjai hmei čang hmăng kơ Ih.