Read Rade Klei Mmuñ Hđăp 36 Bible Online

Klei Mmuñ Hđăp 36 - Rade bible

Klei Mmuñ Hđăp 36

¹Kơ khua phung mmuñ. Klei mmuñ hđăp Y-Đawit, dĭng ƀuăl Yêhôwa. Klei soh blŭ kơ ai tiê pô ƀai, ñu amâo huĭ mpŭ kơ Aê Diê ôh.

²Kyuadah ñu mgao snăk, mĭndah Aê Diê amâo srăng ƀuh leh anăn bi êmut ôh kơ klei wê ñu.

³Mơ̆ng ƀăng êgei ñu kbiă klei wê leh anăn klei mplư; ñu amâo lŏ ngă hŏng klei thâo mĭn leh anăn klei jăk ôh.

⁴Êjai ñu đih ti jhưng pĭt, ñu duah êlan ngă klei wê; klei ñu ngă amâo jăk ôh, ñu amâo hngah kơ klei soh ôh.

⁵Ơ Yêhôwa, klei ih khăp đĭ truh kơ adiê; leh anăn klei sĭt suôr ih truh ti knam.

⁶Klei kpă ênô ih jing msĕ si čư̆ Aê Diê, klei ih phat kđi jing msĕ si êa ksĭ êlam; Ơ Yêhôwa, ih yơh răng kriê mnuih wăt hlô mnơ̆ng.

⁷Ơ Aê Diê, klei Ih khăp yuôm êdimima! Ti gŭ êyui siap Ih phung anak mnuih đuĕ dăp.

⁸Diñu trei hŏng mnơ̆ng êbeh dlai hlăm sang Ih; leh anăn Ih bi mnăm diñu mơ̆ng êa krông jăk mơak Ih.

⁹Kyuadah Ih jing akŏ klei hdĭp; hŏng klei mngač Ih hmei ƀuh klei mngač.

¹⁰Brei klei Ih khăp dôk nanao kơ phung thâo kral Ih, leh anăn brei klei kpă ênô Ih kơ phung mâo ai tiê kpă.

¹¹Đăm brei jơ̆ng pô mgao hmao kâo ôh, kăn brei kngan phung ƀai suôt kâo rei.

¹²Tinăn phung ngă klei wê lĕ leh, arăng bi êbuh diñu, leh anăn diñu amâo lŏ dưi kgŭ ôh.