Read Rade Klei Mmuñ Hđăp 37 Bible Online

Klei Mmuñ Hđăp 37 - Rade bible

Klei Mmuñ Hđăp 37

¹Klei mmuñ hđăp Y-Đawit. Đăm rŭng răng ôh kyua phung ngă ƀai, kăn tluh kơ phung ngă klei soh rei.

²Amâo sui ôh diñu srăng dliu msĕ si rơ̆k, leh anăn krô msĕ si rơ̆k mtah.

³Knang bĕ kơ Yêhôwa leh anăn ngă klei jăk; dôk bĕ hlăm čar leh anăn hdĭp hŏng klei sĭt suôr Ñu.

⁴Mơak bĕ hlăm Yêhôwa, leh anăn Ñu srăng brei kơ ih klei ai tiê ih čiăng.

⁵Jao êlan ih kơ Yêhôwa; knang kơ Ñu, leh anăn Ñu srăng ngă klei anăn.

⁶Ñu srăng bi êdah klei kpă ênô ih msĕ si klei mngač, leh anăn klei djŏ ih msĕ si yang hruê dơ̆ng.

⁷Dôk kriêp ti anăp Yêhôwa, leh anăn čang guôn kơ Ñu; đăm rŭng răng ôh kyua sa čô dưi hlăm klei ñu ngă, kyua pô dưi ngă klei jhat ñu čiăng.

⁸Đăm ăl ôh, lui klei ngêñ! Đăm rŭng răng ôh; klei anăn srăng atăt ih knŏng kơ klei jhat.

⁹Kyuadah arăng srăng bi rai hĕ phung ƀai; ƀiădah phung čang guôn kơ Yêhôwa srăng dưn lăn ala.

¹⁰Adôk ƀiă amâo srăng lŏ ƀuh phung ƀai ôh; wăt tơdah ih duah bi nik ti anôk diñu dôk leh, diñu amâo lŏ dôk tinăn ôh.

¹¹Ƀiădah phung luă gŭ srăng mă bha lăn čar, leh anăn srăng dôk hơ̆k mơak kyua mâo mnơ̆ng êbeh dlai.

¹²Pô ƀai trông čhai čiăng ngă kơ pô kpă, leh anăn ñu kriêt êgei čiăng ngă kơ gơ̆.

¹³Ƀiădah Yêhôwa tlao mưč kơ pô ƀai, kyuadah ñu ƀuh hruê pô ƀai srăng rai.

¹⁴Phung ƀai suê̆ đao gưm leh anăn ƀêč hna diñu, čiăng bi êbuh pô ƀun ƀin leh anăn pô kƀah mnơ̆ng, čiăng bi mdjiê phung êbat hŏng klei kpă.

¹⁵Đao gưm diñu srăng tlŏ tiê boh diñu pô, leh anăn hna diñu srăng joh hĕ.

¹⁶Ƀiă mnơ̆ng pô kpă mâo jing jăk hĭn kơ mnơ̆ng êbeh dlai lu phung ƀai mâo.

¹⁷Kyuadah păl phung ƀai arăng srăng bi joh; ƀiădah Yêhôwa krơ̆ng phung kpă.

¹⁸Yêhôwa thâo hruê phung kpă, leh anăn ngăn dưn diñu srăng dôk nanao.

¹⁹Diñu amâo hêñ ôh êjai klei knap mñai, hlăm hruê ư̆ êpa diñu mâo mnơ̆ng êbeh dlai.

²⁰Ƀiădah phung ƀai srăng rai tuč; phung roh Yêhôwa jing msĕ si klei siam kdrăn rơ̆k: diñu rai tuč, luč msĕ si săp pui.

²¹Pô ƀai čan leh anăn amâo bi wĭt ôh, ƀiădah pô kpă thâo kmah leh anăn ñu brei čan.

²²Kyuadah phung Aê Diê hơêč hmưi leh srăng mă bha lăn čar, ƀiădah phung Ñu tăm pah arăng srăng bi rai hĕ.

²³Yêhôwa atăt gai knhuang sa čô mnuih, leh anăn Ñu bi kjăp pô êbat hlăm êlan bi mơak kơ Ñu.

²⁴Wăt tơdah digơ̆ êbuh, digơ̆ amâo srăng rai ôh, kyuadah Yêhôwa krơ̆ng digơ̆ hŏng kngan ñu.

²⁵Kâo jing leh hlăk ai, ară anei kâo mduôn leh; ƀiădah kâo amâo tuôm ƀuh ôh arăng lui hĕ pô kpă, amâodah ƀuh phung anak ñu hiu dan akâo mnơ̆ng ƀơ̆ng huă.

²⁶Ñu thâo brei pap leh anăn brei arăng čan nanao, leh anăn phung anak ñu jing akŏ klei jăk jĭn.

²⁷Lui klei jhat leh anăn ngă klei jăk; snăn ih srăng dôk hlăm lăn čar hlŏng lar.

²⁸Kyuadah Yêhôwa khăp kơ klei kpă; Ñu amâo srăng lui ôh phung doh jăk Ñu. Ñu kiă kriê phung kpă nanao, ƀiădah phung anak pô ƀai arăng srăng bi rai hĕ.

²⁹Phung kpă srăng dưn čar, leh anăn diñu srăng dôk tinăn nanao.

³⁰Ƀăng êgei pô kpă ênô blŭ klei thâo mĭn, leh anăn êlah ñu hưn klei kpă.

³¹Klei bhiăn Aê Diê ñu dôk hlăm ai tiê ñu; jơ̆ng ñu amâo ksak ôh.

³²Pô ƀai kăp ngă kơ pô kpă ênô, leh anăn duah bi mdjiê gơ̆.

³³Yêhôwa amâo srăng lui gơ̆ hlăm kngan pô ƀai ôh, amâodah lui arăng bi kmhal gơ̆ ti hruê phat kđi.

³⁴Čang guôn bĕ kơ Yêhôwa, tui êlan Ñu, leh anăn Ñu srăng brei ih dưi dưn lăn čar; ih srăng ƀuh tơdah arăng bi rai phung ƀai.

³⁵Kâo ƀuh leh pô ƀai ngă hŏng klei ktang, ñu jing dlông msĕ si sa ƀĕ ana kyâo sêdar.

³⁶Ƀiădah kâo lŏ găn, leh anăn nĕ anei, ñu amâo lŏ dôk tinăn ôh; wăt tơdah kâo duah ñu leh, kâo amâo dưi ƀuh ñu ôh.

³⁷Ksiêm bĕ kơ mnuih jăk leh anăn dlăng kơ mnuih kpă, kyuadah anak čô sa čô mnuih êđăp ênang srăng dôk nanao.

³⁸Ƀiădah phung gao klei bhiăn srăng rai jih; arăng srăng bi rai anak čô pô ƀai.

³⁹Klei bi mtlaih phung kpă kbiă hriê mơ̆ng Yêhôwa; Ñu jing anôk đuĕ dăp kơ digơ̆ êjai mâo klei knap mñai.

⁴⁰Yêhôwa đru digơ̆ leh anăn bi mtlaih digơ̆; Ñu dŏng digơ̆ mơ̆ng phung ƀai leh anăn bi êngiê digơ̆, kyuadah digơ̆ đuĕ dăp hlăm Ñu.