Read Rade Klei Mmuñ Hđăp 42 Bible Online

Klei Mmuñ Hđăp 42 - Rade bible

Klei Mmuñ Hđăp 42

¹Kơ khua phung mmuñ. Klei phung anak Y-Kôrê mtô mjuăt. Msĕ si sa drei hlô rang ana ƀhŭp ƀhăp mhao kơ êa hnoh, snăn mơh mngăt kâo mhao kơ ih, Ơ Aê Diê ah.

²Mngăt kâo mhao kơ Aê Diê, kơ Aê Diê hdĭp. Hbĭl kâo srăng truh leh anăn ƀuh ƀô̆ mta Aê Diê?

³Êa ală kâo jing mnơ̆ng kâo ƀơ̆ng huă hruê mlam, êjai arăng lač kơ kâo nanao, “Ti Aê Diê ih?”

⁴Êjai kâo ur krao ênguôt, kâo hdơr klei anei: klei kâo nao leh mbĭt hŏng phung lu, leh anăn atăt diñu kơ sang Aê Diê, hŏng klei driâo hơ̆k leh anăn klei mmuñ bi mni, sa phung lu ngă klei huă mnăm.

⁵Si ngă ih êdu ai, Ơ mngăt kâo, leh anăn si ngă ih rŭng răng hlăm lam kâo? Čang hmăng bĕ kơ Aê Diê, kyuadah kâo ăt srăng lŏ bi mni kơ ñu, pô bi mtlaih kâo leh anăn Aê Diê kâo.

⁶Mngăt kâo êdu ai hlăm lam kâo, kyuanăn mơ̆ng lăn čar Yurdan, mơ̆ng čư̆ Hermôn, leh anăn mơ̆ng čư̆ Misar, kâo hdơr mĭn kơ ih.

⁷Anôk êlam iêô anôk êlam kyua ênai êa drai ih lĕ; jih jang êa poh yă ih găn leh ti dlông kâo.

⁸Êjai hruê, Yêhôwa bi êdah klei khăp sĭt suôr ñu; leh anăn êjai mlam, kâo mmuñ bi mni kơ ñu, jing klei wah lač kơ Aê Diê pô brei klei hdĭp kơ kâo.

⁹Kâo lač kơ Aê Diê, Boh Tâo kâo, “Si ngă ih wơr bĭt hĕ kâo leh? Si ngă kâo dôk kơŭ kyăm, kyua pô roh ktư̆ juă kâo?”

¹⁰Phung roh kâo mưč kơ kâo jing msĕ si bi joh klang kâo, êjai diñu lač kơ kâo nanao, “Ti Aê Diê ih?”

¹¹Si ngă ih êdu ai, Ơ mngăt kâo, leh anăn si ngă ih rŭng răng hlăm lam kâo? Čang hmăng bĕ kơ Aê Diê; kyuadah kâo ăt srăng lŏ bi mni kơ ñu, pô bi mtlaih kâo leh anăn Aê Diê kâo.