Read Rade Klei Mmuñ Hđăp 45 Bible Online

Klei Mmuñ Hđăp 45 - Rade bible

Klei Mmuñ Hđăp 45

¹Kơ khua phung mmuñ; djŏ kơ đŏk Sôsanim. Klei mmuñ hđăp phung anak Y-Kôrê, čiăng mtô mjuăt. Klei mmuñ kơ klei khăp. Ai tiê kâo bŏ dlai hŏng sa klei jăk siam; kâo čih klei duê anei pioh kơ mtao; êlah kâo jing msĕ si giê čih sa čô čih hră mâo klei knhâo.

²Ih jing siam hĭn kơ phung anak êkei mnuih; ƀăng kƀông ih blŭ hŏng klei pap; kyuanăn Aê Diê hơêč hmưi klei jăk jĭn kơ ih hlŏng lar.

³Ơ pô jhŏng ktang, čiêng đao gưm ih jing klei guh kơang leh anăn klei kdrăm ih.

⁴Hŏng klei kdrăm brei ih đĭ aseh nao kơ klei dưi, čiăng mgang klei sĭt nik, klei êdu êun leh anăn klei kpă; brei kngan hnuă ih bi êdah bruă krưp ih ngă.

⁵Ƀrăm ih knur snăk, tlŏ ti tiê boh phung roh mtao; phung ƀuôn sang lĕ ti gŭ jơ̆ng ih.

⁶Jhưng mtao Ih, Ơ Aê Diê, srăng dôk nanao hlŏng lar. Giê mtao ƀuôn ala mtao Ih jing giê mtao klei kpă;

⁷Ih khăp klei kpă ênô leh anăn bi êmut klei ƀai. Kyuanăn Aê Diê, Aê Diê ih, trôč leh ih hŏng êa ƀâo mngưi klei hơ̆k mơak hing ang hĭn kơ jih jang phung găp ih.

⁸Jih jang čhiăm ao ih bi ƀâo mngưi hŏng êa mir, alôê, leh anăn kas; klei arăng pĕ đĭng brô̆ bi mơak kơ ih hlăm sang mtao ngă hŏng mla.

⁹Mâo anak mniê phung mtao hlăm phung mniê ih mpŭ mtao mniê dôk tĭng hnuă ih, mprăp leh hŏng mah mơ̆ng Ôphir.

¹⁰Hmư̆ bĕ, Ơ anak mniê, ksiêm leh anăn mđing knga; wơr bĭt hĕ phung ƀuôn sang ih leh anăn sang ama ih.

¹¹Mtao srăng khăp kơ klei siam ih. Kyuadah ñu jing khua ih, buôn kkuh bĕ kơ ñu.

¹²Phung ƀuôn sang ƀuôn Tir srăng djă ba mnơ̆ng myơr; wăt phung mdrŏng hĭn srăng kwưh klei ih pap.

¹³Siam êdi yơh anak mniê mtao hlăm adŭ ñu, ñu hơô čhiăm ao mñam hŏng mah.

¹⁴Arăng atăt ñu ti anăp mtao hơô čhiăm ao siam; phung mniê êra hrông găp ñu êbat ti tluôn ñu.

¹⁵Arăng srăng atăt digơ̆ hŏng klei hơ̆k leh anăn klei mơak brei digơ̆ mŭt sang mtao.

¹⁶Phung anak êkei ih srăng hrô anôk phung aê ih, ih srăng mdưm digơ̆ jing anak mtao dôk tar ƀar čar.

¹⁷Kâo srăng brei anăn ih jing hing ang hlăm jih jang ênuk; kyuanăn phung ƀuôn sang srăng mpŭ mni kơ ih nanao hlŏng lar.