Read Rade Klei Mmuñ Hđăp 48 Bible Online

Klei Mmuñ Hđăp 48 - Rade bible

Klei Mmuñ Hđăp 48

¹Klei mmuñ. Klei mmuñ hđăp phung anak Y-Kôrê. Yêhôwa jing prŏng leh anăn năng kơ jih klei arăng bi mni hlăm ƀuôn Aê Diê drei ti čư̆ doh jăk Ñu.

²Čư̆ Siôn jing siam kyua ñu dlông, jing klei hơ̆k mơak kơ jih lăn ala, msĕ si anôk dlông hĭn phă dưr, jing ƀuôn kơ Mtao prŏng.

³Hlăm ƀuôn mtao anăn, Aê Diê bi êdah Ñu pô jing anôk đuĕ dăp hơĭt sĭt.

⁴Kyuadah nĕ anei, phung mtao bi kƀĭn, diñu hriê ti anăp mđrăm mbĭt čiăng bi blah.

⁵Diñu dlăng kơ ƀuôn Siôn, diñu bi kngăr, diñu mâo klei rŭng răng, leh anăn diñu đuĕ mtam.

⁶Tinăn diñu ktư̆ yơ̆ng, diñu ruă msĕ si sa čô mniê đih pui.

⁷Hŏng angĭn mơ̆ng ngŏ Ih bi mčah kŭmpăn čar Tarsis.

⁸Ya klei hmei hmư̆, hmei ƀuh leh klei anăn hlăm ƀuôn Yêhôwa kơ phung kahan, hlăm ƀuôn Aê Diê drei, ƀuôn Aê Diê srăng bi kjăp hlŏng lar. (Sêla)

⁹Ơ Aê Diê, hmei mĭn leh kơ klei khăp sĭt suôr Ih, hlăm sang yang Ih.

¹⁰Msĕ si anăn Ih, Ơ Aê Diê, snăn klei bi mni kơ Ih truh ti knhal lăn ala. Kngan hnuă Ih bŏ hŏng klei kpă ênô.

¹¹Brei čư̆ Siôn dôk mơak, brei phung anak mniê čar Yuđa hơ̆k kdơ̆k, kyua klei Ih phat kđi.

¹²Êbat jŭm dar ƀuôn Siôn, yap bĕ sang tum ñu,

¹³dlăng bi nik kơ mnư̆ ñu, ksiêm kđông mgang ñu, čiăng yăl dliê kơ găp djuê ênuk êdei.

¹⁴Kyuadah Aê Diê anei jing Aê Diê drei nanao hlŏng lar, Ñu srăng jing Pô atăt gai hmei hlŏng lar.