Read Rade Klei Mmuñ Hđăp 49 Bible Online

Klei Mmuñ Hđăp 49 - Rade bible

Klei Mmuñ Hđăp 49

¹Kơ khua phung mmuñ. Klei mmuñ hđăp phung anak Y-Kôrê. Ơ jih jang phung ƀuôn sang, hmư̆ bĕ klei anei! Ơ jih jang phung dôk hlăm lăn ala, mđing knga bĕ,

²wăt phung điêt leh anăn phung prŏng, phung mdrŏng sah leh anăn phung ƀun ƀin mđrăm mbĭt.

³Ƀăng êgei kâo srăng blŭ klei thâo mĭn; klei mĭn hlăm ai tiê kâo srăng brei klei thâo săng.

⁴Kâo srăng mđing knga kâo kơ klei bi hriêng; kâo srăng bi êdah klei blŭ hgăm hŏng asăp đĭng brô̆.

⁵Ya yuôm kâo huĭ êjai ênuk knap mñai, tơdah phung roh kâo dôk jŭm kâo,

⁶phung knang kơ klei mdrŏng diñu, leh anăn bi mni kơ diñu pô kyua ngăn dưn diñu jing lu?

⁷Sĭt nik amâo mâo sa čô dưi bi tui ayŏng adei ñu ôh, kăn dưi brei kơ Aê Diê rei ênoh klei bi tui klei hdĭp gơ̆.

⁸Kyuadah klei bi tui klei hdĭp arăng yuôm snăk, amâo mâo ênoh dưi blei ôh,

⁹čiăng kơ ñu dưi dôk hdĭp nanao, amâo ƀuh ôh klei brŭ rai.

¹⁰Sĭt nik ñu srăng ƀuh wăt phung thâo mĭn djiê; mnuih mluk mgu srăng rai tuč msĕ mơh, leh anăn lui ngăn drăp diñu kơ phung mkăn.

¹¹Msat diñu jing sang diñu hlŏng lar, anôk diñu srăng dôk hlăm jih jang ênuk, wăt tơdah diñu bi anăn lăn hŏng anăn diñu pô dưn.

¹²Klei mdrŏng sah mnuih amâo dưi mgang ñu kơ klei djiê ôh; ñu jing msĕ si hlô mnơ̆ng thâo rai tuč.

¹³Anei jing êlan kơ phung knang kơ klei mluk, leh anăn phung tui hlue klei diñu blŭ. (Sêla)

¹⁴Diñu jing msĕ si sa phung biăp čuăn pioh kơ Ƀuôn Phung Djiê, Klei Djiê srăng jing mgăt diñu; tơdah truh aguah phung kpă srăng mâo klei dưi kiă kriê diñu; klei siam diñu srăng brŭ rai hlăm ƀuôn phung djiê.

¹⁵Ƀiădah Aê Diê srăng bi tui mngăt kâo mơ̆ng klei myang Ƀuôn Phung Djiê, kyuadah Ñu srăng jum kâo. (Sêla)

¹⁶Đăm huĭ ôh tơdah sa čô mnuih hriê kơ mdrŏng, tơdah ngăn drăp hlăm sang ñu srăng lar.

¹⁷Kyuadah tơdah ñu djiê, ñu amâo srăng djă ba sa mta mnơ̆ng ôh; ngăn drăp ñu amâo srăng trŭn nao mbĭt hŏng ñu ôh.

¹⁸Wăt tơdah ñu mâo klei mơak êjai ñu dôk hdĭp, leh anăn wăt tơdah arăng bi mni kơ ñu tơdah ñu mâo djăp mta mnơ̆ng,

¹⁹ñu srăng nao kơ anôk phung aê ñu dôk, phung amâo srăng lŏ tuôm ƀuh klei mngač ôh.

²⁰Pô mdrŏng sah, ƀiădah amâo mâo klei thâo săng ôh, jing msĕ si hlô mnơ̆ng thâo rai tuč.