Read Rade Klei Mmuñ Hđăp 50 Bible Online

Klei Mmuñ Hđăp 50 - Rade bible

Klei Mmuñ Hđăp 50

¹Klei mmuñ hđăp Y-Asap. Yêhôwa, Aê Diê Pô Myang, blŭ leh, Ñu iêô lăn ala dơ̆ng mơ̆ng anôk yang hruê ƀlĕ truh ti anôk yang hruê lĕ.

²Mơ̆ng ƀuôn Siôn, ƀuôn siam klă, Aê Diê mtrang klei guh kơang Ñu.

³Aê Diê drei hriê, Ñu amâo dôk ñăt ôh, ti anăp Aê Diê mâo pui trơ̆ng, jŭm Ñu mâo angĭn êbŭ ktang.

⁴Ñu iêô phung adiê ti dlông leh anăn lăn ala, čiăng kơ Ñu dưi phat kđi phung ƀuôn sang Ñu:

⁵“Bi kƀĭn bĕ kơ Kâo phung doh jăk Kâo, phung ngă leh klei bi mguôp hŏng Kâo hŏng mnơ̆ng ngă yang.”

⁶Phung adiê hưn klei kpă ênô Ñu, kyuadah Aê Diê pô yơh jing khua phat kđi. (Sêla)

⁷“Dôk hmư̆ bĕ, Ơ phung ƀuôn sang Kâo, leh anăn Kâo srăng blŭ; Ơ phung Israel, Kâo srăng hưn bi kdơ̆ng hŏng diih. Kâo jing Aê Diê, Aê Diê diih.

⁸Kâo amâo ƀuah diih ôh kyua mnơ̆ng diih ngă yang; mnơ̆ng diih myơr čuh dôk ti anăp Kâo nanao.

⁹Kâo amâo srăng tŭ ôh êmô knô mơ̆ng sang diih, kăn tŭ rei bê knô mơ̆ng war biăp diih.

¹⁰Kyuadah jih jang hlô hlăm kmrơ̆ng jing dŏ Kâo, wăt hlô ti lu êbâo čư̆.

¹¹Kâo thâo kral jih jang čĭm hlăm čư̆, leh anăn jih jang mnơ̆ng thâo kpư̆ hlăm dliê jing dŏ Kâo sơăi.

¹²Tơdah Kâo êpa, Kâo amâo srăng hưn kơ diih ôh; kyuadah lăn ala jing dŏ Kâo, wăt jih jang mnơ̆ng hlăm ñu.

¹³Kâo ƀơ̆ng kđeh čĭm êmô knô mơ̆? Amâodah mnăm êrah bê knô mơ̆?

¹⁴Myơr klei bi mni kơ Aê Diê jing mnơ̆ng ngă yang, leh anăn bi sĭt klei diih ƀuăn hŏng Pô Ti Dlông Hĭn;

¹⁵iêô wah lač kơ Kâo hlăm hruê knap mñai; Kâo srăng bi mtlaih diih leh anăn diih srăng bi guh kơang kơ Kâo.”

¹⁶Ƀiădah Aê Diê lač kơ pô ƀai: “Si ih mâo klei dưi răk klei bhiăn Kâo, leh anăn blŭ kơ klei Kâo bi mguôp?

¹⁷Kyuadah ih bi êmut kơ klei Kâo mjuăt mkra, leh anăn ih hwiê klei Kâo blŭ ti tluôn ih.

¹⁸Tơdah ih ƀuh sa čô knĕ, ih jing găp ñu; leh anăn ih dôk mbĭt hŏng phung tlĕ piu.

¹⁹Ih jao ƀăng êgei ih blŭ klei ƀai, leh anăn êlah ih blŭ klei mplư.

²⁰Ih dôk gŭ leh anăn blŭ bi kdơ̆ng hŏng ayŏng adei ih; ih mčeh kơ anak êkei amĭ ih.

²¹Klei anăn ih ngă leh, leh anăn Kâo dôk ñăt; ih mĭn Kâo jing msĕ si ih. Ƀiădah ară anei Kâo ƀuah ih, leh anăn kčŭt kơ klei soh ih ngă.

²²Brei ih thâo bi nik klei anei, Ơ pô wơr bĭt Aê Diê leh, huĭdah Kâo srăng hiêk bi rai ih, leh anăn amâo mâo pô dưi bi mtlaih ih ôh.

²³Hlei pô myơr klei bi mni jing mnơ̆ng ngă yang, diñu mpŭ kơ Kâo yơh; kơ hlei pô dôk dơ̆ng ƀơ̆ng huă djŏ, Kâo srăng bi êdah kơ diñu klei Aê Diê bi mtlaih.”