Read Rade Klei Mmuñ Hđăp 54 Bible Online

Klei Mmuñ Hđăp 54 - Rade bible

Klei Mmuñ Hđăp 54

¹Kơ khua phung mmuñ; hŏng đĭng brô̆. Klei Y-Đawit mtô mjuăt, hlăk phung Sip nao lač kơ Y-Sôl, “Amâo djŏ hĕ Y-Đawit đuĕ dăp hlăm phung hmei?”. Ơ Aê Diê, bi mtlaih kâo hŏng anăn Ih, leh anăn bi êdah kâo kpă hŏng klei myang Ih.

²Ơ Aê Diê, hmư̆ bĕ klei kâo wah lač; mđing knga kơ klei ƀăng êgei kâo blŭ.

³Kyuadah phung tue kgŭ ngă kơ kâo, phung ƀai duah bi mdjiê kâo; diñu amâo mĭn kơ Aê Diê ôh. (Sêla)

⁴Nĕ anei, Aê Diê jing Pô đru kâo; Khua Yang jing Pô krơ̆ng mngăt kâo.

⁵Ñu srăng bi wĭt klei ƀai kơ phung roh kâo; hlăm klei sĭt suôr Ih, Ơ Yêhôwa, bi rai phung anăn.

⁶Kâo srăng myơr mnơ̆ng ngă yang hŏng klei čŏng čiăng kơ Ih, kâo srăng bi mni kơ anăn Ih, Ơ Yêhôwa, kyuadah Ih jing jăk.

⁷Kyuadah Ih bi mtlaih kâo leh mơ̆ng jih klei rŭng răng, leh anăn ală kâo ƀuh leh klei kâo dưi hŏng phung roh kâo.