Read Rade Klei Mmuñ Hđăp 55 Bible Online

Klei Mmuñ Hđăp 55 - Rade bible

Klei Mmuñ Hđăp 55

¹Kơ khua phung mmuñ: hŏng đĭng brô̆. Klei Y-Đawit mtô mjuăt. Ơ Aê Diê, mđing knga kơ klei kâo wah lač; leh anăn đăm hngah kơ klei kâo kwưh ôh.

²Dôk hmư̆ kâo, leh anăn lŏ wĭt lač kơ kâo; kâo êdu ai leh kyua klei dleh truh kơ kâo. Kâo rŭng răng leh

³kyua asăp phung roh, leh anăn kyua klei phung ƀai ktư̆ juă. Kyuadah diñu bi truh klei dleh kơ kâo, leh anăn diñu tiŏ ngă kơ kâo hŏng klei ăl.

⁴Ai tiê kâo ênguôt snăk, klei huĭ kơ djiê bi kdjăt kâo.

⁵Klei huĭ leh anăn klei ktư̆ yơ̆ng truh kơ kâo, leh anăn klei huĭ êdimima dưi hŏng kâo.

⁶Kâo lač, “Ơ, čiăng mâo siap msĕ si mgăm! Snăn kâo dưi phiơr đuĕ leh anăn mdei,

⁷sĭt nik, kâo dưi đuĕ kbưi, leh anăn dôk hlăm kdrăn tač. (Sêla)

⁸Kâo dưi ruăt đuĕ dăp mơ̆ng angĭn ktang, mơ̆ng angĭn êbŭ.”

⁹Ơ Khua Yang, bi luč hĕ klei diñu čiăng ngă, leh anăn bi lŭk klei diñu blŭ; kyuadah kâo ƀuh leh hlăm ƀuôn prŏng klei măk ƀai leh anăn klei bi čĭk bi čăm.

¹⁰Hruê mlam diñu êbat jŭm dar ti dlông mnư̆ ƀuôn; klei wê leh anăn klei mnêč dôk ti krah ƀuôn.

¹¹Klei bi rai dôk tar ƀar; klei ktư̆ juă leh anăn klei mplư bi bŏ êlan ñu.

¹²Amâo djŏ pô roh kâo ôh dlao wač kơ kâo; tơdah snăn kâo dưi tŭ. Amâo jing pô bi êmut ngă kơ kâo hŏng klei mgao; tơdah snăn kâo dưi đuĕ dăp mơ̆ng ñu.

¹³Ƀiădah jing ih yơh, pô mđơr hŏng kâo, pô jing găp kâo, leh anăn mah jiăng kâo.

¹⁴Pô kâo tuôm bi mguôp leh hŏng klei jăk snăk; pô tuôm êbat leh mbĭt hlăm sang Aê Diê mbĭt hŏng phung lu.

¹⁵Brei klei djiê truh kơ phung roh kâo, brei diñu trŭn hdĭp kơ Ƀuôn Phung Djiê; klei ƀai dôk hlăm sang leh anăn ai tiê diñu.

¹⁶Ƀiădah kâo iêô wah lač kơ Aê Diê; leh anăn Yêhôwa srăng bi mtlaih kâo.

¹⁷Tlam, aguah, leh anăn yang hruê dơ̆ng kâo ur ênguôt, leh anăn ñu hmư̆ asăp kâo.

¹⁸Ñu srăng bi tui kâo mơ̆ng klei bi blah, leh anăn brei kơ kâo klei êđăp ênang, kyuadah lu phung čiăng ngă kơ kâo.

¹⁹Aê Diê srăng hmư̆ leh anăn bi luă gŭ diñu, gơ̆ jing Pô kiă kriê mơ̆ng ênuk hlŏng lar. (Sêla) Kyuadah diñu amâo bi mlih klei diñu ngă ôh, leh anăn amâo huĭ mpŭ kơ Aê Diê ôh.

²⁰Găp kâo yơr kngan čiăng ngă kơ phung mah jiăng ñu, ñu gao leh klei ñu bi mguôp.

²¹Ƀăng êgei ñu blŭ klei siam snăk, ƀiădah ai tiê ñu mĭn kơ klei bi blah. Boh ñu blŭ êbhơr hĭn kơ êa prăi, ƀiădah diñu jing đao gưm suê̆ leh.

²²Lưh klei ktrŏ ih kơ Yêhôwa, leh anăn Ñu srăng krơ̆ng ih; Ñu amâo srăng tuôm brei phung kpă ênô mgei ôh.

²³Ƀiădah Ih yơh, Ơ Aê Diê, srăng dlăm diñu hlăm ƀăng êlam hĭn; phung tuh êrah leh anăn mplư srăng djiê êlâo truh sa mkrah ênuk arăng bi kčah kơ diñu hdĭp. Ƀiădah kâo srăng knang kơ Ih.