Read Rade Klei Mmuñ Hđăp 56 Bible Online

Klei Mmuñ Hđăp 56 - Rade bible

Klei Mmuñ Hđăp 56

¹Kơ khua phung mmuñ: djŏ kơ đŏk Yônat Êlem Rêhôkim. Klei mmuñ hđăp Y-Đawit, hlăk phung Philistin mă ñu ti ƀuôn Gat. Pap mñai kơ kâo, Ơ Aê Diê, kyuadah phung mnuih tiŏ mă kâo; jih hruê phung roh ktư̆ juă kâo.

²Phung roh kâo tiŏ mă kâo jih hruê, kyuadah phung mgao bi blah hŏng kâo jing lu êdi.

³Tơdah kâo huĭ, kâo srăng knang kơ Ih.

⁴Kâo bi mni kơ klei Ñu blŭ, kâo knang kơ Aê Diê, amâo huĭ ôh. Ya mnuih thâo djiê dưi ngă kơ kâo?

⁵Jih hruê diñu bi msoh klei kâo blŭ, jih klei diñu mĭn čiăng ngă jhat kơ kâo.

⁶Diñu bi kƀĭn, diñu lua, diñu kăp ti êlan kâo, msĕ si diñu kăp bi mdjiê kâo,

⁷Bi wĭt klei msĕ snăn kơ diñu kyua klei soh diñu. Ơ Aê Diê, dlăm phung ƀuôn sang kyua klei Ih ăl.

⁸Ih thâo leh jih klei rŭng răng kâo; mđŭ bĕ êa ală kâo hlăm giêt Ih! Amâo djŏ hĕ Ih čih pioh leh diñu hlăm hdruôm hră Ih?

⁹Tơdah kâo ur krao kơ Ih, phung roh kâo srăng kdŭn đuĕ. Klei anei kâo thâo: Aê Diê dôk tĭng kơ kâo.

¹⁰Kâo knang kơ Aê Diê leh anăn bi mni kơ klei Ñu blŭ; kâo knang kơ Yêhôwa leh anăn bi mni kơ klei Ñu čih;

¹¹kâo knang kơ Aê Diê, kâo amâo huĭ ôh. Ya mnuih dưi ngă kơ kâo?

¹²Ơ Aê Diê, kâo srăng bi sĭt jih klei kâo ƀuăn kơ Ih; kâo srăng myơr mnơ̆ng bi mni kơ Ih.

¹³Kyuadah Ih bi mtlaih leh mngăt kâo mơ̆ng klei djiê; Ih krơ̆ng jơ̆ng kâo amâo brei ksak ôh, čiăng kơ kâo dưi êbat ti anăp Aê Diê hlăm klei mngač klei hdĭp.