Read Rade Klei Mmuñ Hđăp 58 Bible Online

Klei Mmuñ Hđăp 58 - Rade bible

Klei Mmuñ Hđăp 58

¹Kơ khua phung mmuñ: djŏ kơ đŏk Al-Taset. Klei mmuñ hđăp Y-Đawit. Ơ phung anak mnuih, sĭt mơ̆ klei diih dôk kriêp jing kpă? Diih phat kđi phung anak mnuih hŏng klei kpă mơ̆?

²Hơăi, hlăm ai tiê diih mĭn ngă klei wê; hlăm lăn ala kngan diih ngă klei ƀai.

³Phung ƀai soh leh mơ̆ng tian amĭ diñu, diñu wơr êlan leh anăn blŭ klei luar mơ̆ng hruê kkiêng kơ diñu.

⁴Diñu mâo êa kêč kam msĕ si êa kêč kam ala, diñu jing msĕ si ala kpơ̆ng kngăl, kăt knga ñu,

⁵tơl ñu amâo hmư̆ ôh asăp phung mƀlum ñu, wăt tơdah phung anăn thâo mnêč êdimima.

⁶Ơ Aê Diê, bi joh hĕ êgei hlăm ƀăng êgei diñu; Ơ Yêhôwa, bi joh hĕ griăng êđai êmông gu.

⁷Brei diñu luč msĕ si êa đoh đuĕ; tơdah diñu mnah hna, brei ƀrăm diñu joh leh.

⁸Brei diñu jing msĕ si ƀlă lik leh anăn rai luč, jing msĕ si anak djiê hlăm tian, amâo ƀuh yang hruê ôh.

⁹Êlâo kơ gŏ diih tuôm hŏng klei hlơr pui djuh êruê, mtah amâodah krô pui dôk ƀơ̆ng, angĭn mơ̆ng Aê Diê srăng kpuh mđung diñu.

¹⁰Phung kpă srăng hơ̆k mơak tơdah ñu ƀuh klei rŭ ênua anăn; diñu srăng rao jơ̆ng diñu hlăm êrah phung ƀai.

¹¹Phung mnuih srăng lač, “Sĭt nik mâo klei mưn kơ pô kpă; sĭt nik mâo sa čô Aê Diê phat kđi ti lăn ala.”