Read Rade Klei Mmuñ Hđăp 59 Bible Online

Klei Mmuñ Hđăp 59 - Rade bible

Klei Mmuñ Hđăp 59

¹Kơ khua phung mmuñ: djŏ kơ đŏk Al-Taset. Klei mmuñ hđăp Y-Đawit, hlăk Y-Sôl tiŏ nao mnuih wang jŭm sang ñu čiăng bi mdjiê ñu. Ơ Aê Diê kâo, bi mtlaih kâo mơ̆ng phung roh kâo, mgang kâo mơ̆ng phung bi kdơ̆ng hŏng kâo.

²Bi mtlaih kâo mơ̆ng phung ngă jhat, bi mtlaih kâo mơ̆ng phung tuh êrah.

³Kyuadah nĕ anei, diñu dôk kăp čiăng bi mdjiê kâo; phung ƀai bi kƀĭn čiăng ngă kơ kâo. Amâo djŏ ôh kyua kâo gao klei bhiăn, kăn kyua klei soh kâo rei, Ơ Yêhôwa.

⁴Wăt tơdah kâo amâo soh ôh, diñu mkra êlan čiăng ngă kơ kâo. Mdih bĕ Ih, đru kâo, leh anăn dôk dlăng.

⁵Ih, Ơ Yêhôwa Aê Diê kơ phung kahan, jing Aê Diê Israel. Kgŭ bĕ, bi kmhal jih jang găp djuê mnuih. Đăm pap ôh sa čô hlăm phung ƀai lhiăr anăn. (Sêla)

⁶Diñu lŏ hriê grăp tlam, aliu msĕ si asâo, hiu tar ƀar ƀuôn.

⁷Tinăn diñu dôk ur blŭ klei jhat; êlah diñu jing msĕ si đao gưm hlăm ƀăng kƀông diñu. Kyuadah diñu mĭn, “Hlei pô dưi hmư̆ hmei?”

⁸Ƀiădah Ih, Ơ Yêhôwa, tlao mưč kơ diñu; Ih mưč kơ jih jang găp djuê mnuih anăn.

⁹Ơ Klei Ktang kâo, kâo kăp dlăng kơ Ih, kyuadah, Ơ Aê Diê, Ih yơh jing kđông mgang kâo.

¹⁰Aê Diê kâo srăng bi tuôm hŏng kâo kyua klei Ñu khăp; Aê Diê kâo srăng brei kâo dlăng klei kâo dưi hŏng phung roh kâo.

¹¹Ơ Khua Yang, Pô jing khil kơ hmei. Đăm bi mdjiê diñu ôh, huĭdah phung ƀuôn sang kâo wơr bĭt; bi prah prŭng diñu hŏng klei myang Ih, leh anăn mdlưh diñu,

¹²Kyua klei soh mơ̆ng ƀăng êgei diñu, boh blŭ mơ̆ng ƀăng kƀông diñu, brei arăng mă diñu hlăm klei mgao diñu pô. Kyua diñu blŭ klei tăm pah leh anăn klei luar,

¹³bi rai diñu hlăm klei Ih ngêñ, bi rai diñu jih nguêč, čiăng kơ phung mnuih thâo kơ Aê Diê yơh kiă kriê phung Yakôp, truh ti knhal lăn ala. (Sêla)

¹⁴Grăp tlam diñu lŏ hriê, aliu msĕ si asâo, leh anăn hiu tar ƀar ƀuôn.

¹⁵Diñu hiu duah mnơ̆ng ƀơ̆ng huă, leh anăn groh tơdah diñu amâo trei ôh.

¹⁶Ƀiădah kâo srăng mmuñ kơ klei ktang Ih; ti aguah kâo srăng mmuñ kraih kơ klei Ih khăp. Kyuadah Ih jing leh kđông mgang kơ kâo, anôk kâo đuĕ dăp ti hruê kâo mâo klei rŭng răng.

¹⁷Ơ Klei Ktang kâo, kâo srăng mmuñ bi mni kơ Ih, kyuadah, Ơ Aê Diê, Ih yơh jing kđông mgang kâo, Aê Diê, Pô brei kơ kâo klei khăp.