Read Rade Klei Mmuñ Hđăp 63 Bible Online

Klei Mmuñ Hđăp 63 - Rade bible

Klei Mmuñ Hđăp 63

¹Klei mmuñ hđăp Y-Đawit, hlăk ñu dôk hlăm kdrăn tač Yuđa . Ơ Aê Diê, Ih jing Aê Diê kâo, kâo duah Ih, mngăt kâo mhao kơ Ih; asei mlei kâo krao kơ Ih msĕ si lăn thu amâo mâo êa, amâo lŏ čăt jing mnơ̆ng ôh.

²Kâo dôk dlăng leh kơ Ih hlăm adŭ doh jăk, ƀuh leh klei myang leh anăn klei guh kơang Ih.

³Kyuadah klei khăp Ih yuôm hĭn kơ klei hdĭp, ƀăng kƀông kâo srăng bi mni kơ Ih.

⁴Snăn kâo srăng bi mni kơ Ih jih ênuk kâo dôk hdĭp; kâo srăng yơr kngan kâo leh anăn iêô wah lač kơ anăn Ih.

⁵Mngăt kâo trei hŏng mnơ̆ng ƀơ̆ng jăk, leh anăn ƀăng êgei kâo bi mni kơ Ih hŏng klei mmuñ mơak.

⁶Kâo dôk mĭn kơ Ih êjai kâo đih ti jhưng pĭt, leh anăn mĭn kơ Ih êjai gak mlam;

⁷kyuadah Ih jing leh Pô đru leh kâo, kâo mmuñ hơ̆k mơak ti êyui siap Ih.

⁸Ai tiê kâo dôk giăm Ih; kngan hnuă Ih krơ̆ng kâo.

⁹Ƀiădah phung duah čiăng bi luč klei hdĭp kâo srăng trŭn nao kơ anôk êlam ti lăn ala.

¹⁰Đao gưm srăng koh diñu, diñu srăng jing mnơ̆ng kơ asâo dliê ƀơ̆ng.

¹¹Ƀiădah mtao srăng hơ̆k mơak hlăm Aê Diê; jih jang phung ngă klei ƀuăn kơ Ñu srăng mâo klei hơ̆k mơak; kyuadah arăng srăng brei ƀăng êgei phung luar dôk kriêp ñăt.