Read Rade Klei Mmuñ Hđăp 66 Bible Online

Klei Mmuñ Hđăp 66 - Rade bible

Klei Mmuñ Hđăp 66

¹Kơ khua phung mmuñ. Sa klei mmuñ. Sa klei mmuñ hđăp. Brei jih lăn ala ur hơ̆k bĕ kơ Aê Diê;

²mmuñ bĕ klei guh kơang kơ anăn Ñu, bi mni kơ Ñu bĕ.

³Lač bĕ kơ Aê Diê, “Bruă Ih bi krưp êdi! Klei ktang Ih prŏng snăk tơl phung roh Ih buôn huĭ ti anăp Ih.

⁴Jih jang lăn ala kkuh mpŭ kơ Ih; diñu mmuñ bi mni kơ Ih; diñu mmuñ bi mni kơ anăn Ih.” (Sêla)

⁵Hriê dlăng bruă Aê Diê ngă leh; Ñu ngă bruă bi krưp ti krah phung mnuih.

⁶Ñu bi mlih êa ksĭ brei jing lăn thu; mnuih êbat jơ̆ng găn êa krông. Ti anôk anăn hmei mâo klei hơ̆k mơak kyua Ñu.

⁷Ñu kiă kriê hlŏng lar hŏng klei myang Ñu, ală Ñu čuă dlăng phung găp djuê mnuih. Đăm brei phung bi kdơ̆ng bi mđĭ digơ̆ pô ôh. (Sêla)

⁸Ơ phung ƀuôn sang, bi mni bĕ kơ Aê Diê drei, brei arăng hmư̆ asăp klei drei bi mni kơ Ñu.

⁹Ñu yơh pioh drei ăt dôk hdĭp, leh anăn amâo brei jơ̆ng drei ksak ôh.

¹⁰Kyuadah Ih lông dlăng leh hmei, Ơ Aê Diê; Ih lông dlăng leh hmei msĕ si bi doh prăk.

¹¹Ih kpuh hmei lĕ hlăm ñuăl; Ih brei hmei gui ktrŏ.

¹²Ih brei phung roh ktư̆ juă hmei; hmei găn leh pui leh anăn êa; ƀiădah Ih ăt atăt hmei leh kơ anôk mâo mnơ̆ng êbeh dlai.

¹³Kâo srăng mŭt hlăm sang yang Ih ba mnơ̆ng myơr čuh; kâo srăng bi sĭt klei kâo ƀuăn leh kơ Ih,

¹⁴klei ƀăng kƀông kâo ƀuăn, leh anăn ƀăng êgei kâo blŭ leh êjai kâo knap mñai.

¹⁵Kâo srăng myơr kơ Ih mnơ̆ng myơr čuh êmŏng, mbĭt hŏng săp pui prăi biăp knô. Kâo srăng myơr êmô knô leh anăn bê knô. (Sêla)

¹⁶Hriê dôk hmư̆ bĕ, Ơ jih jang phung huĭ mpŭ kơ Aê Diê, leh anăn kâo srăng yăl dliê klei Ñu đru leh kâo.

¹⁷Kâo ur kraih leh kơ Ñu, leh anăn êlah kâo mmuñ bi mni kơ Ñu.

¹⁸Tơdah kâo khăp pioh leh klei wê hlăm ai tiê kâo, Khua Yang amâo dôk hmư̆ kâo ôh.

¹⁹Ƀiădah sĭt nik Aê Diê hmư̆ leh; Ñu mđing leh knga kơ asăp kâo wah lač.

²⁰Mpŭ mni kơ Aê Diê, kyuadah Ñu amâo tuôm hngah klei kâo wah lač ôh, kăn Ñu sua mă rei klei Ñu khăp mơ̆ng kâo!