Read Rade Klei Mmuñ Hđăp 69 Bible Online

Klei Mmuñ Hđăp 69 - Rade bible

Klei Mmuñ Hđăp 69

¹Kơ khua phung mmuñ: djŏ kơ đŏk Sôsanim. Klei mmuñ hđăp Y-Đawit. Bi mtlaih kâo, Ơ Aê Diê; kyuadah êa lip đĭ truh ti kkuê kâo.

²Kâo kdlŭt hlăm lŭ êlam, tinăn amâo mâo anôk juă jơ̆ng ôh. Kâo truh leh ti anôk êa êlam, leh anăn êa lip guôm kâo.

³Kâo êmăn leh kyua ur; đŏk kâo thu leh. Ală kâo dliu leh kyua dôk guôn Aê Diê kâo.

⁴Phung bi êmut kơ kâo amâo mâo klei jing lu hĭn kơ ƀŭk ti dlông boh kŏ kâo; phung čiăng bi rai kâo amâo mâo klei jing jhŏng ktang, ya mnơ̆ng kâo amâo tuôm tlĕ ôh, arăng brei kâo lŏ čiu.

⁵Ơ Aê Diê, Ih thâo kral leh klei mluk kâo; klei soh kâo amâo hgăm kơ Ih ôh.

⁶Đăm brei ôh phung čang hmăng hlăm Ih hêñ kyua kâo, Ơ Khua Yang, Yêhôwa kơ phung kahan. Đăm brei ôh phung duah Ih hêñ kyua kâo, Ơ Aê Diê phung Israel.

⁷Kyua Ih kâo gui klei arăng dlao wač, klei hêñ guôm ƀô̆ mta kâo.

⁸Kâo jing hĕ tue kơ phung ayŏng adei kâo, sa čô pô ti êngao hlăm phung anak amĭ kâo.

⁹Kyuadah klei hur har kơ sang yang Ih čuh kâo, leh anăn klei arăng dlao wač kơ Ih lĕ leh ti kâo.

¹⁰Tơdah kâo luă gŭ kâo pô hŏng klei kăm ƀơ̆ng huă, klei anăn jing klei bi hêñ kâo.

¹¹Tơdah kâo hơô klŭng, kâo jing mnơ̆ng diñu djă djik djak.

¹²Phung dôk gŭ ti ƀăng jang bi blŭ mưč kơ kâo, leh anăn phung kpiê ruă mmuñ bi hlă kơ kâo.

¹³Ƀiădah kâo wah lač leh kơ Ih, Ơ Yêhôwa. Ti hruê găl, Ơ Aê Diê, hlăm klei khăp Ih êbeh dlai, lŏ wĭt lač bĕ kơ kâo hŏng klei sĭt nik klei Ih bi mtlaih.

¹⁴Ktŭng kâo mơ̆ng lŭ kdlŭt, đăm brei kâo kngăm ôh, bi mtlaih kâo bĕ mơ̆ng phung bi êmut kơ kâo, leh anăn mơ̆ng êa êlam.

¹⁵Đăm brei êa lip guôm kâo, kăn brei ƀăng êa êlam lun kâo rei, leh anăn đăm brei ôh ƀăng êlam sir hĕ ti dlông kâo.

¹⁶Lŏ wĭt lač kơ kâo, Ơ Yêhôwa; kyuadah klei khăp Ih jing jăk; tui si klei pap prŏng Ih, wir dlăng kơ kâo đa.

¹⁷Đăm mdăp ƀô̆ mta Ih mơ̆ng dĭng buăl Ih; kyuadah kâo dôk hlăm klei knap mñai, brei Ih ruăt lŏ wĭt lač kơ kâo.

¹⁸Hriê giăm leh anăn bi tui mngăt kâo, bi êngiê kâo kyua phung roh kâo.

¹⁹Ih thâo leh klei kâo hêñ, ŏ guam leh anăn arăng amâo mpŭ kơ kâo ôh; Ih thâo leh jih jang phung roh kâo.

²⁰Klei arăng dlao wač bi mčah leh ai tiê kâo; snăn kâo êdu ai. Kâo duah klei pap, ƀiădah amâo mâo ôh; kâo duah phung bi juh, ƀiădah kâo amâo ƀuh sa čô ôh.

²¹Diñu brei êa phĭ jing mnơ̆ng kâo ƀơ̆ng huă; leh anăn tơdah kâo mhao, diñu brei kâo mnăm êa msăm.

²²Brei jhưng huă ti anăp diñu jing kđông ƀêč kơ diñu; leh anăn jing ñuăl ti krah klei êđăp ênang diñu.

²³Bi mmăt hĕ ală diñu tơl diñu amâo thâo ƀuh ôh; leh anăn brei kơiêng diñu ktư̆ yơ̆ng nanao.

²⁴Tuh ti diñu klei Ih ngêñ, leh anăn brei klei Ih ăl hmao diñu.

²⁵Brei anôk diñu dôk jing ênguôl, đăm brei mâo mnuih dôk hlăm sang čhiăm diñu ôh.

²⁶Kyuadah diñu ngă jhat kơ pô Ih čăm leh, leh anăn yăl dliê klei knap kơ phung Ih bi êka leh.

²⁷Lŏ thiăm klei soh kơ klei soh diñu; leh anăn đăm brei Ih yap diñu kpă ênô ôh.

²⁸Lăm hĕ anăn diñu mơ̆ng hdruôm hră klei hdĭp; leh anăn đăm čih anăn diñu ôh mbĭt hŏng phung kpă ênô.

²⁹Ƀiădah kâo knap mñai leh anăn ruă snăk; Ơ Aê Diê, brei klei bi mtlaih Ih rŭ kâo.

³⁰Kâo srăng bi mni kơ anăn Aê Diê hŏng klei mmuñ; kâo srăng mpŭ mni kơ Ñu hŏng klei hdơr knga.

³¹Klei anăn srăng bi mơak kơ Yêhôwa êgao hĭn kơ klei ngă yang hŏng êmô, êgao hĭn kơ sa drei êmô knô mâo ki leh anăn kčuôp.

³²Phung ƀun ƀin ƀuh klei anăn leh anăn mơak; Ơ phung duah Aê Diê, brei ai tiê diih hdĭp.

³³Kyuadah Yêhôwa dôk hmư̆ phung kƀah mnơ̆ng, leh anăn Ñu amâo bi êmut ôh kơ phung Ñu ăt dôk jing mnă.

³⁴Brei adiê leh anăn lăn ala bi mni kơ Ñu, wăt êa ksĭ leh anăn mnơ̆ng kpư̆ hiu hlăm anăn.

³⁵Kyuadah Aê Diê srăng bi mtlaih ƀuôn Siôn leh anăn lŏ mdơ̆ng jih jang ƀuôn prŏng Yuđa; phung dĭng buăl Ñu srăng dôk tinăn, leh anăn mă bha lăn anăn.

³⁶Phung anak čô phung dĭng buăl Ñu srăng dưn čar anăn; leh anăn phung khăp kơ anăn Ñu srăng dôk tinăn.