Read Rade Klei Mmuñ Hđăp 74 Bible Online

Klei Mmuñ Hđăp 74 - Rade bible

Klei Mmuñ Hđăp 74

¹Klei Y-Asap mtô mjuăt. Ơ Aê Diê, ya ngă Ih lui hĕ hmei, ya ngă Ih ngêñ kơ phung biăp hlăm kdrăn rơ̆k mda Ih hlŏng lar?

²Brei Ih hdơr kơ phung ƀuôn sang Ih ruah mơ̆ng mphŭn dô, phung Ih bi tui leh čiăng mjing găp djuê ngăn dưn Ih; brei Ih hdơr kơ čư̆ Siôn, anôk Ih dôk leh.

³Êbat nao bĕ kơ anôk mâo klei rai hlŏng lar, phung roh bi rai leh jih hlăm adŭ doh jăk.

⁴Phung roh Ih ur driâo leh ti krah anôk doh jăk Ih; diñu kă leh čhiăm gru diñu pô tinăn.

⁵Diñu jing msĕ si phung yua jông druôm kyâo hlăm kmrơ̆ng.

⁶Diñu bi mčah kyâo mâo rup krah hlăm sang yang, hŏng jông leh anăn kmŭt.

⁷Diñu čuh leh adŭ doh jăk Ih; diñu bi čhŏ leh anôk Ih pioh kơ anăn Ih.

⁸Diñu lač hdơ̆ng diñu pô, drei srăng bi rai jih nguêč; diñu čuh leh jih jang anôk kkuh mpŭ kơ Aê Diê hlăm čar.

⁹Hmei amâo lŏ ƀuh klei bi knăl Ih dôk mbĭt hŏng hmei ôh, amâo lŏ mâo khua pô hưn êlâo ôh; kăn mâo rei pô hlăm phung hmei thâo dŭm boh sui klei anei srăng dôk.

¹⁰Dŭm boh sui, Ơ Aê Diê, pô roh srăng mưč kơ Ih? Pô roh srăng dlao wač anăn Ih hlŏng lar mơ̆?

¹¹Ya ngă Ih kñŭn hĕ kngan Ih, ya ngă Ih amâo yơr kngan hnuă bi rai diñu ôh?

¹²Ƀiădah Ih, Ơ Aê Diê Mtao kâo mơ̆ng ênuk đưm, dôk ngă klei bi mtlaih ti krah lăn ala.

¹³Ih mơh bi mbha leh êa ksĭ hŏng klei myang Ih; Ih bi mčah leh boh kŏ anak rai hlăm êa ksĭ.

¹⁴Ih mơh bi mčah leh boh kŏ lêwiathan; Ih brei ñu jing mnơ̆ng ƀơ̆ng huă kơ hlô mnơ̆ng dôk hlăm kdrăn tač.

¹⁵Ih mơh brei akŏ êa ƀlĕ leh anăn brei êa hnoh đoh; Ih bi khuôt hĕ êa krông prŏng.

¹⁶Hruê jing dŏ Ih, wăt mlam jing dŏ Ih mơh. Ih pô hrih boh mngač leh anăn yang hruê.

¹⁷Ih bi kčah leh jih knông lăn ala; yan bhang leh anăn yan puih jing bruă Ih ngă.

¹⁸Brei Ih hdơr kơ klei pô roh mưč leh Ih, Ơ Yêhôwa, sa phung găp djuê mluk mgu blŭ mgao kơ anăn Ih.

¹⁹Đăm jao ôh klei hdĭp ktrâo Ih kơ hlô dliê; đăm wơr bĭt nanao klei hdĭp phung ƀuôn sang Ih knap mñai.

²⁰Brei Ih hdơr kơ klei Ih bi mguôp; kyuadah anôk mmăt hlăm lăn čar bŏ hŏng phung ƀai.

²¹Đăm brei phung arăng ktư̆ juă hêñ ôh; brei pô knap leh anăn ƀun ƀin dưi bi mni kơ anăn Ih.

²²Kgŭ bĕ Ih, Ơ Aê Diê, mgang klei Ih; brei Ih hdơr kơ klei phung mluk mgu mưč kơ Ih jih hruê.

²³Đăm wơr bĭt ôh asăp hao hao phung roh Ih, klei phung bi kdơ̆ng hŏng Ih bi rŭng nanao.