Read Rade Klei Mmuñ Hđăp 76 Bible Online

Klei Mmuñ Hđăp 76 - Rade bible

Klei Mmuñ Hđăp 76

¹Kơ khua phung mmuñ: hŏng đĭng brô̆. Klei mmuñ hđăp Y-Asap. Klei mmuñ. Hlăm čar Yuđa arăng thâo kral Aê Diê; anăn Ñu hing ang hlăm čar Israel.

²Sang čhiăm Ñu dôk ti ƀuôn Salem, leh anăn anôk Ñu dôk ti čư̆ Siôn.

³Tinăn Ñu bi rai leh ƀrăm, khil, đao gưm, leh anăn mnơ̆ng bi blah. (Sêla)

⁴Ih mâo klei kdrăm guh kơang hĭn, kơ čư̆ ti anôk arăng plah mă.

⁵Arăng plah mă leh dŏ phung mâo ai tiê ktang, phung anăn dôk pĭt hlăm klei djiê; jih jang phung jhŏng ktang amâo dưi yơr kngan diñu ngă ôh.

⁶Tơdah ih ƀuah, Ơ Aê Diê Y-Yakôp, aseh wăt pô đĭ aseh êbuh djiê.

⁷Ih yơh jing Pô năng kơ arăng huĭ; hlei pô dưi bi kdơ̆ng hŏng Ih tơdah Ih ăl?

⁸Mơ̆ng adiê Ih blŭ klei phat kđi; lăn ala huĭ leh anăn dôk ñăt

⁹tơdah Aê Diê kgŭ čiăng phat kđi, čiăng bi mtlaih jih jang phung knap mñai ti lăn ala. (Sêla)

¹⁰Sĭt nik klei mnuih ngêñ ăt srăng brei klei bi mni kơ Ih; Ih srăng yua klei ngêñ ăt dôk, bi guh kơang Ih.

¹¹Ngă klei ƀuăn kơ Yêhôwa Aê Diê diih, leh anăn bi sĭt bĕ; brei jih jang ƀuôn sang riêng gah Ñu hriê myơr mnơ̆ng kơ Aê Diê pô năng kơ arăng huĭ.

¹²Ñu khăt hĕ klei mgao phung anak mtao; phung mtao ti lăn ala huĭ kơ Ñu.