Read Rade Klei Mmuñ Hđăp 77 Bible Online

Klei Mmuñ Hđăp 77 - Rade bible

Klei Mmuñ Hđăp 77

¹Kơ khua phung mmuñ tui si Yêduthun. Klei mmuñ hđăp Y-Asap. Kâo ur kraih kơ Aê Diê, kâo krao kơ Aê Diê; čiăng kơ ñu dưi hmư̆ asăp kâo.

²Ti hruê rŭng răng kâo duah Khua Yang. Êjai mlam kâo yơr kngan kâo, amâo êmăn ôh; ƀiădah mngăt kâo amâo mâo klei bi juh ôh.

³Tơdah kâo hdơr kơ Ih, Ơ Aê Diê, kâo krao; kâo dôk ksiêm mĭn, leh anăn mngăt kâo djiê hwăt. (Sêla)

⁴Ih amâo brei kâo pĭt ôh; kâo rŭng răng tơl amâo dưi blŭ ôh.

⁵Kâo ksiêm mĭn kơ hruê mphŭn dô, kâo hdơr kơ thŭn ênuk đưm đă.

⁶Kâo dôk mĭn êjai mlam kơ klei kâo mmuñ; kâo ksiêm mĭn hlăm ai tiê kâo, leh anăn mngăt kâo duah bi nik.

⁷Khua Yang srăng hngah nanao mơ̆ leh anăn amâo lŏ pap kơ kâo ôh?

⁸Klei khăp Ñu ruê̆ leh hlŏng lar mơ̆? Klei Ñu ƀuăn luč nanao mơ̆?

⁹Aê Diê wơr bĭt mơ̆ klei Ñu thâo pap? Hlăm klei Ñu ăl, Ñu kơ̆ng leh mơ̆ klei Ñu pap? (Sêla)

¹⁰Leh anăn kâo lač, “kâo ênguôt snăk, kyua kngan hnuă Pô Ti Dlông Hĭn bi mlih leh”.

¹¹Kâo srăng hdơr kơ bruă Yêhôwa; sĭt nik kâo srăng hdơr kơ bruă yuôm bhăn Ih mphŭn dô.

¹²Kâo srăng mĭn kơ jih bruă Ih ngă leh, leh anăn ksiêm kơ klei Ih ngă leh.

¹³Ơ Aê Diê, êlan Ih jing doh jăk; hlei yang jing prŏng msĕ si Aê Diê?

¹⁴Ih jing Aê Diê Pô ngă klei yuôm bhăn; Pô bi êdah leh klei myang Ih ti krah phung ƀuôn sang.

¹⁵Hŏng păl ktang Ih, Ih bi tui leh phung ƀuôn sang Ih, phung anak êkei Y-Yakôp leh anăn Y-Yôsep. (Sêla)

¹⁶Ơ Aê Diê, phung êa ƀuh Ih, phung êa ƀuh Ih, diñu huĭ; sĭt nik ƀăng êlam ktư̆ yơ̆ng.

¹⁷Phung knam tuh êa hjan; grăm đah hlăm adiê, leh anăn ƀrăm kmlă Ih phiơr tar ƀar.

¹⁸Grăm Ih đah hlăm angĭn đrŭng; kmlă mtrang lăn ala; lăn ala ktư̆ yơ̆ng leh anăn mgei.

¹⁹Ih êbat ti êa ksĭ, Ih găn ti êa êlam, ƀiădah kru jơ̆ng Ih arăng amâo ƀuh ôh.

²⁰Ih atăt ba phung ƀuôn sang Ih msĕ si sa phung biăp, hŏng kngan Y-Môis leh anăn Y-Arôn.