Read Rade Klei Mmuñ Hđăp 8 Bible Online

Klei Mmuñ Hđăp 8 - Rade bible

Klei Mmuñ Hđăp 8

¹Kơ khua phung mmuñ: djŏ kơ đŏk Gitit. Klei mmuñ hđăp Y-Đawit. Ơ Yêhôwa, Khua Yang hmei, anăn Ih kdrăm kơah hlăm jih lăn ala! Ih mdưm klei guh kơang Ih ti dlông hĭn kơ jih phung adiê.

²Ih brei phung hđeh điêt wăt phung arăng dôk bi mam bi mni kơ Ih, kyua phung roh Ih, čiăng brei pô roh leh anăn pô rŭ ênua dôk ñăt.

³Tơdah kâo dlăng kơ phung adiê jing bruă kđiêng Ih ngă, mlan leh anăn phung mtŭ mnơ̆ng Ih hrih leh;

⁴ya anak mnuih jing tơl Ih hdơr mĭn kơ diñu, leh anăn ya anak mnuih jing tơl Ih răng kriê kơ diñu?

⁵Ih mjing ñu ƀiă ti gŭ Aê Diê, leh anăn Ih mđua ñu klei guh kơang leh anăn klei mpŭ.

⁶Ih brei ñu kiă kriê jih bruă kngan Ih ngă leh; Ih dưm jih jang mnơ̆ng ti gŭ jơ̆ng ñu leh,

⁷jih jang biăp leh anăn êmô, wăt jih jang hlô dliê,

⁸wăt čĭm hlăm adiê, leh anăn kan hlăm êa ksĭ, jih jang mnơ̆ng tui hlue êlan hlăm êa ksĭ.

⁹Ơ Yêhôwa, Khua Yang hmei, Anăn Ih kdrăm kơah hlăm jih lăn ala!