Read Rade Klei Mmuñ Hđăp 80 Bible Online

Klei Mmuñ Hđăp 80 - Rade bible

Klei Mmuñ Hđăp 80

¹Kơ khua phung mmuñ: djŏ kơ đŏk Sôsanim Êdut. Klei mmuñ hđăp Y-Asap. Mđing knga Ih, Ơ Mgăt Biăp phung Israel, Ơ, Pô atăt phung Yôsep msĕ si sa phung biăp; mtrang bĕ, Ơ Pô dôk gŭ ti dlông phung čêrubim

²ti anăp phung Êphraim, phung Benjamin, leh anăn phung Manasê. Bi êrâo klei myang Ih, leh anăn hriê bi mtlaih hmei.

³Ơ Aê Diê, lŏ bi kơrŭ hmei; brei ƀô̆ mta Ih mtrang kơ hmei, čiăng kơ hmei dưi tlaih.

⁴Ơ Yêhôwa, Aê Diê kơ phung kahan, dŭm boh sui Ih srăng ăl kơ klei phung ƀuôn sang Ih wah lač?

⁵Ih brei diñu ƀơ̆ng kpŭng klei ênguôt, leh anăn brei diñu mnăm êa ală lu êbeh.

⁶Ih brei phung riêng gah hmei bi êmut kơ hmei; leh anăn phung roh hmei tlao mưč kơ hmei.

⁷Ơ Aê Diê kơ phung kahan, lŏ bi kơrŭ hmei bĕ; brei ƀô̆ mta Ih mtrang kơ hmei, čiăng kơ hmei dưi tlaih.

⁸Ih bi kbiă leh mơ̆ng čar Êjip sa phŭn boh kriăk ƀâo; Ih suôt leh phung găp djuê mnuih leh anăn Ih pla leh phŭn boh kriăk ƀâo anăn.

⁹Ih mkra lăn leh kơ gơ̆, gơ̆ mtrŭn agha leh anăn bi bŏ leh lăn.

¹⁰Êyui gơ̆ guôm leh jih jang čư̆, adhan gơ̆ guôm ana kyâo sêdar dlông.

¹¹Adhan gơ̆ drung truh ti êa ksĭ, leh anăn kƀiêng gơ̆ truh ti êa krông.

¹²Snăn si ngă Ih bi klưh leh mnư̆ gơ̆, tơl jih jang phung găn gao tlĕ boh gơ̆?

¹³Hlô ŭn dliê čuk ƀơ̆ng gơ̆, leh anăn jih jang hlô dliê ƀơ̆ng gơ̆ mơh.

¹⁴Ơ Aê Diê kơ phung kahan, lŏ hriê bĕ! Dlăng mơ̆ng adiê ti dlông leh anăn ƀuh! Răng kriê kơ phŭn boh kriăk ƀâo anei,

¹⁵mnơ̆ng kngan hnuă Ih pô pla leh, anak êkei Ih rông leh kơ Ih pô.

¹⁶Arăng čuh gơ̆ hŏng pui leh, arăng khăt gơ̆ leh; diñu rai tuč hŏng klei Ih dlăng ƀuah kơ diñu.

¹⁷Brei Ih ênă kngan ti pô dôk tĭng hnuă Ih, ti anak mnuih pô Ih bi kjăp leh čiăng mă bruă Ih.

¹⁸Snăn hmei amâo srăng lui wir Ih ôh; lŏ bi hdĭp hmei bĕ, leh anăn hmei srăng iêô wah lač kơ anăn Ih.

¹⁹Ơ Yêhôwa, Aê Diê kơ phung kahan, lŏ bi kơrŭ hmei bĕ; brei ƀô̆ mta Ih mtrang kơ hmei, čiăng kơ hmei dưi tlaih.