Read Rade Klei Mmuñ Hđăp 85 Bible Online

Klei Mmuñ Hđăp 85 - Rade bible

Klei Mmuñ Hđăp 85

¹Kơ khua phung mmuñ. Klei mmuñ hđăp phung anak Y-Kôrê. Ơ Yêhôwa, Ih brei klei jăk leh kơ čar Ih pô; Ih atăt wĭt leh phung mnă Yakôp.

²Ih pap brei leh klei wê phung ƀuôn sang Ih: Ih guôm leh jih jang klei soh diñu. (Sêla)

³Ih lui leh jih klei Ih ngêñ; Ih mdei leh klei Ih ăl ktang.

⁴Bi kơrŭ hmei bĕ, Ơ Aê Diê pô bi mtlaih hmei, brei Ih lui hĕ klei Ih čôñ kơ hmei.

⁵Ih srăng ăl kơ hmei hlŏng lar mơ̆? Ih srăng pioh klei Ih ăl hlăm jih jang ênuk mơ̆?

⁶Ih amâo srăng lŏ brei klei hdĭp kơ hmei mơ̆ čiăng kơ phung ƀuôn sang Ih dưi mâo klei mơak hlăm Ih?

⁷Ơ Yêhôwa, brei hmei ƀuh klei Ih khăp sĭt suôr, leh anăn brei kơ hmei klei Ih bi mtlaih.

⁸Kâo srăng hmư̆ ya klei Aê Diê Yêhôwa srăng lač; kyuadah Ñu srăng blŭ klei êđăp ênang kơ phung ƀuôn sang Ñu, kơ phung doh jăk Ñu, ƀiădah đăm brei diñu lŏ wĭt ngă klei mluk ôh.

⁹Sĭt nik klei Ñu bi mtlaih giăm truh kơ phung huĭ mpŭ kơ Ñu, čiăng kơ čar drei dưi mâo klei guh kơang.

¹⁰Klei khăp leh anăn klei sĭt suôr srăng bi tuôm mbĭt; klei kpă ênô leh anăn klei êđăp ênang srăng bi kmiêk.

¹¹Klei sĭt suôr srăng čăt đĭ mơ̆ng lăn, leh anăn klei kpă ênô srăng dlăng mơ̆ng adiê.

¹²Sĭt nik Yêhôwa srăng brei klei jăk, leh anăn lăn drei srăng mboh mnga lu.

¹³Klei kpă ênô srăng êbat ti anăp Khua Yang, leh anăn srăng mkra êlan kơ Ñu êbat.