Read Rade Klei Mmuñ Hđăp 86 Bible Online

Klei Mmuñ Hđăp 86 - Rade bible

Klei Mmuñ Hđăp 86

¹Klei Y-Đawit Wah Lač. Ơ Yêhôwa, mđing knga Ih, leh anăn lŏ wĭt lač kơ kâo bĕ, kyuadah kâo jing knap mñai leh anăn ƀun ƀin.

²Kiă kriê mngăt kâo, kyuadah kâo kpă. Ih jing Aê Diê kâo, Bi mtlaih bĕ dĭng buăl Ih, pô knang kơ Ih.

³Pap mñai kơ kâo, Ơ Khua Yang; kyuadah kâo ur kwưh kơ Ih jih hruê.

⁴Bi mơak bĕ mngăt dĭng buăl Ih; kyuadah mngăt kâo dôk čang hmăng kơ Ih, Ơ Khua Yang,

⁵kyuadah Ih jing jăk leh anăn thâo pap brei, Ơ Khua Yang. Ih bŏ hŏng klei khăp kơ jih jang phung iêô wah lač kơ Ih.

⁶Ơ Yêhôwa, mđing knga kơ klei kâo wah lač; hmư̆ bĕ asăp kâo kwưh.

⁷Kâo iêô wah lač kơ Ih hlăm hruê kâo knap mñai, kyuadah Ih srăng lŏ wĭt lač kơ kâo.

⁸Ơ Khua Yang, amâo mâo ôh pô jing msĕ si Ih hlăm phung yang; kăn mâo bruă mkăn rei msĕ si bruă Ih.

⁹Jih jang phung găp djuê mnuih Ih mjing leh srăng hriê buôn kkuh ti anăp Ih, Ơ Khua Yang; leh anăn diñu srăng brei klei guh kơang kơ anăn Ih.

¹⁰Kyuadah Ih jing prŏng leh anăn ngă bruă yuôm bhăn; knŏng hjăn Ih yơh jing Aê Diê.

¹¹Ơ Yêhôwa, bi hriăm kâo êlan Ih, čiăng kơ kâo dưi êbat hlăm klei sĭt nik Ih; brei ai tiê kâo thâo huĭ mpŭ kluôm dhuôm kơ anăn Ih.

¹²Hŏng jih ai tiê kâo bi mni kơ Ih, Ơ Khua Yang Aê Diê kâo, leh anăn kâo srăng mpŭ mni kơ anăn Ih nanao hlŏng lar.

¹³Kyuadah klei Ih khăp sĭt suôr jing prŏng snăk kơ kâo; Ih bi mtlaih leh mngăt kâo mơ̆ng ƀăng êlam Ƀuôn Phung Djiê.

¹⁴Ơ Aê Diê, phung mgao kgŭ ngă kơ kâo, sa phung mnuih ƀai tiŏ čiăng bi mdjiê kâo. Diñu amâo uêñ kơ Ih ôh.

¹⁵Ƀiădah Ih, Ơ Khua Yang, jing Aê Diê thâo pap leh anăn mâo ai tiê jăk, amâo djăl ăl ôh, bŏ hŏng klei khăp leh anăn klei sĭt suôr.

¹⁶Wir dlăng kơ kâo leh anăn pap mñai kơ kâo; brei klei ktang Ih kơ dĭng buăl Ih, leh anăn bi mtlaih anak êkei dĭng buăl mniê Ih.

¹⁷Brei kơ kâo sa klei bi knăl kơ klei Ih pap, čiăng kơ phung bi êmut kơ kâo dưi ƀuh leh anăn hêñ, kyuadah Ih, Ơ Yêhôwa, đru kâo leh anăn bi juh kâo.